اتىراۋدا العاش رەت قاتەرلى ىسىككە شالدىققان ناۋقاستىڭ وكپەسىنە توراكوسكوپيا وتاسى جاسالدى
اتىراۋ. KAZINFORM - اتىراۋ دارىگەرلەرى قاتەرلى ىسىگى بار ناۋقاستىڭ وكپەسىنە توراكوسكوپيا وتاسىن جاسادى. بۇل -جەرگىلىكتى ونكولوگيا ديسپانسەرىندەگى العاشقى وتا.
اتىراۋ وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن ءمالىم ەتكەندەي، سول جاق ءسۇت بەزىندە قاتەرلى ىسىگى بار ناۋقاسقا بۇرىن وتا جاسالعان. سودان سوڭ حيميوتەراپيا، ساۋلە ەمى تاعايىندالعان.
«ناۋقاس جوسپارلانعان ەمدەۋ كۋرسىن ۇدايى الىپ ءجۇردى. ءبىراق، قازىر ناۋقاستا مەتاستازىنىڭ ورشىگەنى انىقتالدى. سول سەبەپتەن، ىسىكتىڭ وكپە مەن باس ميىنا تارالۋىنىڭ الدىن الۋ تاكتيكاسى جوسپارلاندى. وكپەنىڭ تومەنگى سول جاق بولىگىنە اتيپيكالىق رەزەكتسيا جاسالىپ، توراسكوپيالىق وتا ارقىلى ىسىك الىندى. توراكوسكوپيا - وكپە قۋىسىنداعى اۋرۋلاردى، ىسىكتەردى تەكسەرۋ جانە الۋ ءۇشىن قولدانىلاتىن از ينۆازيۆتى پروتسەدۋرا ءتۇرى. ءدال وسى وتا وبلىستىق ونكولوگيا ديسپانسەرىندە العاش رەت جاسالىپ وتىر»، - دەپ حابارلادى باسقارمانىڭ باسپا ءسوز قىزمەتى.
بۇل وتانى جاساۋعا حيرۋرگيا ءبولىمىنىڭ مەڭگەرۋشىسى، ونكوحيرۋرگ ماقسات شامشەنوۆ جەتەكشىلىك ەتكەن دارىگەرلەر توبى قاتىسقان. توپ قۇرامىندا اقىلبەك ايتۋعانوۆ، التىنشاش دۇيسەنالييەۆا، انەستەزيولوگ-رەانيماتولوگ الياكبار يماماتدينوۆ بار. جەرگىلىكتى دارىگەرلەردىڭ العاشقى وتاسى ءساتتى اياقتالعان. قازىر ناۋقاس دارىگەرلەردىڭ باقىلاۋىنا الىنعان.
ەسكە سالا كەتەلىك، بۇعان دەيىن اتىراۋ وبلىسى اكىمىنىڭ گرانتىمەن جوعارى ءبىلىم العان 13 دارىگەر جۇمىسقا ورنالاسقانىن حابارلاعان بولاتىنبىز.