اتىراۋدا 24 جاستاعى جۇرگىزۋشىنىڭ كولىگىنەن 71 كيىك ءمۇيىزى تاركىلەندى
اتىراۋ. KAZINFORM - اتىراۋدا 71 كيىك ءمۇيىزىن اكەلە جاتقان 24 جاستاعى جۇرگىزۋشى ۇستالدى. پوليتسيا قىزمەتكەرلەرى كيىك ءمۇيىزىن تاركىلەدى.
اتىراۋ وبلىسى پوليتسيا دەپارتامەنتىنىڭ مالىمەتىنە قاراعاندا، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى «براكونەر-2024» جەدەل پروفيلاكتيكالىق ءىس-شاراسى كەزىندە كۇدىك تۋدىرعان كولىكتى توقتاتقان.
«پوليتسيا قىزمەتكەرلەرى اتىراۋ قالاسىنىڭ اۋماعىنداعى ويىن-ساۋىق ورتالىعىنىڭ جانىندا كۇدىك تۋدىرعان Toyota Highlander ماركالى اۆتوكولىكتى توقتاتىپ، تەكسەرۋ جۇرگىزدى. كولىكتىڭ رۋلىندە 24 جاستاعى جۇرگىزۋشى بولعان. تەكسەرۋ بارىسىندا اۆتوكولىكتىڭ سالونىنان پاكەتكە سالىنعان 71 دانا كيىك ءمۇيىزى تابىلدى. جۇرگىزۋشىگە قاتىستى كيىكتى زاڭسىز قولعا ءتۇسىرۋ، جويۋ، سول سياقتى زاڭسىز قولعا تۇسىرىلگەن كيىكتى نەمەسە ونىڭ دەريۆاتتارىن، ونىڭ ىشىندە مۇيىزدەرىن يەمدەنۋ، ساقتاۋ، وتكىزۋ، اكەلۋ، اكەتۋ، جونەلتۋ، تاسىمالداۋ بويىنشا سوتقا دەيىنگى تەرگەپ-تەكسەرۋ جۇرگىزۋ باستالدى. وزگە اقپارات تەرگەۋ مۇددەسىنە سايكەس جاريالاۋعا جاتپايدى»، - دەپ حابارلادى دەپارتامەنتتىڭ باسپا ءسوز قىزمەتى.
ەسكە سالا كەتەلىك، بۇعان دەيىن «بەكىرە - 2024» ءىس-شاراسى كەزىندە اتىراۋدا براكونەرلەردەن 270 كەلى بەكىرە تاركىلەنگەنىن حابارلاعان بولاتىنبىز.
سونداي-اق، اتىراۋ وبلىسىنىڭ تۇرعىنى 27,6 كەلى بەكىرەمەن ۇستالعانىن جازعان ەدىك.
اۆتور
جولداسبەك شوپەعۇل