اتىراۋ وبلىسىنىڭ مامانداندىرىلعان اۋدانارالىق ەكونوميكالىق سوتى «اتىراۋ Innovations» ج ش س- ءنىڭ كەلىسىمشارتتى ءبىرجاقتى تارتىپپەن بۇزۋىن زاڭسىز دەپ تانىدى.
اتىراۋ وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ 2026-جىلعى 25-تامىزداعى شەشىمىمەن «Alem Qurylys AQ» ج ش س- ءنىڭ تالاپ ارىزى تولىق قاناعاتتاندىرىلعان.
ءىس ماتەريالدارىنا سايكەس، 2026-جىلعى 10-ماۋسىمدا «اتىراۋ Innovations» ج ش س مەن «Alem Qurylys AQ» جانە «KAZPACO» كومپانيالارىنان قۇرالعان كونسورتسيۋم اراسىندا نىساندى تولىقتاي جوبالاۋ جانە «كىلت تاپسىرۋ» فورماتىندا سالۋ شارتىمەن قۇرىلىس جۇرگىزۋگە ارنالعان مەملەكەتتىك ساتىپ الۋ كەلىسىمشارتى جاسالعان.
الايدا بەس كۇننەن كەيىن، 15-ماۋسىمدا «اتىراۋ Innovations» ج ش س كەلىسىمشارتتى ءبىرجاقتى تارتىپپەن بۇزعان. بۇعان وبلىس اكىمىنىڭ سەرىكتەستىكتى تاراتۋ تۋرالى قاۋلىسى نەگىز بولعان.
سوتتا جاۋاپكەر تاراپ كەلىسىمشارتتى بۇزۋ كەزىندە وبلىس اكىمىنىڭ 15-ماۋسىمداعى 107-قاۋلىسى قولدانىستا بولعانىن العا تارتقان. وسىعان بايلانىستى سەرىكتەستىكتى تاراتۋ ءراسىمى باستالعاندىقتان، شارتتىق مىندەتتەمەلەردى ورىنداۋ مۇمكىن بولماعانىن تۇسىندىرگەن.
الايدا سوت بۇل ءۋاجدى نەگىزسىز دەپ تاپتى. ءىس ماتەريالدارىندا كورسەتىلگەندەي، زاڭدى تۇلعانىڭ تاراتىلعانى تۋرالى مالىمەت ۇلتتىق بيزنەس-سايكەستەندىرۋ نومىرلەرى تىزىلىمىنە ەنگىزىلگەننەن كەيىن عانا ونى تاراتۋ اياقتالعان بولىپ ەسەپتەلەدى. ال كەلىسىمشارت بۇزىلعان كەزدە «اتىراۋ Innovations» ج ش س مەملەكەتتىك تىركەۋدە تۇرعان.
بۇعان قوسا، 2026-جىلعى 16-شىلدەدە وبلىس اكىمىنىڭ 136-قاۋلىسىمەن سەرىكتەستىكتى تاراتۋ تۋرالى بۇرىنعى شەشىمنىڭ كۇشى جويىلعان. وسىلايشا، كومپانيانى تاراتۋ ءراسىمى توقتاتىلعان.
- 2026-جىلعى 16-شىلدەدە اتىراۋ وبلىسى اكىمىنىڭ 136-قاۋلىسىمەن «اتىراۋ Innovations» ج ش س- ءنى تاراتۋ تۋرالى 2026-جىلعى 15-ماۋسىمداعى 107-قاۋلىنىڭ كۇشى جويىلعان. اتالعان قاۋلى وعان قول قويىلعان كۇننەن باستاپ كۇشىنە ەنگەن، - دەلىنگەن سوت شەشىمىندە.
سوت وتىرىسىنا وبلىس اكىمىنىڭ اپپاراتى مەن وبلىستىق كاسىپكەرلىك جانە ونەركاسىپ باسقارماسىنىڭ وكىلدەرى ءۇشىنشى تۇلعالار رەتىندە قاتىسقان. ولار تالاپ ارىز بويىنشا شەشىم قابىلداۋدى سوتتىڭ قاراۋىنا قالدىرعان.
ال جاۋاپكەر «اتىراۋ Innovations» ج ش س وكىلى تالاپقا قارسى بولماعان. ول سەرىكتەستىكتىڭ تاراتىلماعانىن جانە كەلىسىمشارتتىق قاتىناستاردى جالعاستىرۋعا دايىن ەكەنىن مالىمدەپتى.
سوت شەشىمىمەن «Alem Qurylys AQ» ج ش س- ءنىڭ تالابى تولىق قاناعاتتاندىرىلىپ، 2026-جىلعى 10-ماۋسىمداعى مەملەكەتتىك ساتىپ الۋ تۋرالى كەلىسىمشارتتى ءبىرجاقتى بۇزۋ زاڭسىز دەپ تانىلدى.
ايتا كەتەيىك، سوت شەشىمىنە اپەللياتسيالىق شاعىم بەرۋگە ءبىر اي مەرزىم قاراستىرىلعان. شەشىم 25-تامىزدا شىققان.
سوتتىڭ كەلىسىمشارتتى بۇزۋدى زاڭسىز دەپ تانۋى جوبانىڭ قۇرىلىسى بىردەن باستالادى دەگەندى بىلدىرمەيدى. سوت شەشىمىندە قۇرىلىس جۇمىسىن باستاۋ نەمەسە جوبانى ىسكە اسىرۋ مەرزىمىنە قاتىستى ناقتى مىندەتتەمە جۇكتەلمەگەن. نەگىزگى داۋ كەلىسىمشارتتى ءبىرجاقتى بۇزۋدىڭ زاڭدىلىعىنا قاتىستى بولىپ وتىر.
بۇعان دەيىن وبلىستىق كاسىپكەرلىك جانە ونەركاسىپ باسقارماسى سوت پروتسەسى اياقتالعاننان كەيىن مەملەكەتتىك ساتىپ الۋ ءراسىمىن قايتا وتكىزۋ ماسەلەسى قارالاتىنىن مالىمدەگەن ەدى.
اتىراۋ وبلىستىق كاسىپكەرلىك جانە ونەركاسىپ باسقارماسى 2026-جىلدىڭ 26-قىركۇيەگىندە سوت شەشىمى زاڭدى كۇشىنە ەندى.
- سوت شەشىمىن ورىنداۋ جانە تاراپتار اراسىنداعى شارتتىق قاتىناستاردى قالپىنا كەلتىرۋ ماقساتىندا 2026-جىلعى 28-قىركۇيەكتە «اتىراۋ Innovations» ج ش س «ەلەكتروندىق قارجى ورتالىعى» ا ق- نا مەملەكەتتىك ساتىپ الۋ ۆەب-پورتالىندا شارتتىڭ قولدانىسىن قالپىنا كەلتىرۋ تۋرالى ءتيىستى حات جولدادى. 6-قازاندا «Alem Qurylys AQ» ج ش س- مەن جاسالعان مەملەكەتتىك ساتىپ الۋ تۋرالى شارتتىڭ قولدانىسى قايتا قالپىنا كەلتىرىلدى، - دەپ مالىمدەدى باسقارمانىڭ باسپا ءسوز قىزمەتى.
اكىمدىكتىڭ رەسمي اقپاراتىنا سۇيەنسەك، جوبانى ودان ءارى ىسكە اسىرۋ بويىنشا ءتيىستى جۇمىس ءجۇرىپ جاتىر.
ايتا كەتەيىك، ينجەنەرلىك جانە ينفراقۇرىلىمدىق جوبا «اتىراۋ» ارنايى ەكونوميكالىق ايماعىنىڭ 400 گەكتار اۋماعىن قامتيدى. مۇندا ەلەكتر، سۋ جانە گاز جەلىلەرى، كارىز جۇيەسى، بايلانىس جەلىلەرى، اۆتوموبيل جانە تەمىرجول ينفراقۇرىلىمى سالىنۋى ءتيىس.
بۇعان دەيىن اتىراۋدا جارىلعان ەلەكتر باعانالارىن اۋىستىرۋ جۇمىسى سوزىلىپ كەتكەنىن جازعان ەدىك.