38 جانە 39 جاستاعى ەكى ايەل اتىراۋداعى ساۋدا ورىندارىنىڭ بىرىندە وتىرىپ، الەۋمەتتىك جەلى ارقىلى تىكەلەي ەفيرگە كىرگەن. كەيىن ءبىرى ءوزىن تەرروريستپىن دەپ تانىستىرىپ، ۇلتتىق قاۋىپسىزدىك كوميتەتىنىڭ قىزمەتكەرلەرى ونى جاقسى تانيتىنىن ايتتى.
اتىراۋ وبلىستىق پوليتسيا دەپارتامەنتى بۇل ۆيدەودان كەيىن ەكى ايەلگە قاتىستى ۇساق بۇزاقىلىق، قۇقىققا قايشى كونتەنت تاراتۋ، سونداي- اق قوعامدىق ورىنداردا ادامنىڭ جەكە باسىن انىقتاۋعا كەدەرگى كەلتىرەتىن كيىم كيۋ دەرەكتەرى بويىنشا ءۇش اكىمشىلىك ءىس قوزعادى. ءىس ماتەريالدارى سوتقا جولداندى.
سونىمەن قاتار ايەلدەرمەن تەولوگ سويلەسىپ، پروفلياكتيكالىق ءىس-شارا جۇرگىزگەن.
— كەزدەسۋ بارىسىندا ولارعا زاڭ تالاپتارى، قوعامدىق ءتارتىپ نورمالارى جانە وسىنداي قۇقىق بۇزۋشىلىقتارعا جول بەرمەۋ قاجەتتىگى ءتۇسىندىرىلدى. الەۋمەتتىك جەلىلەر — زاڭ تالاپتارى قولدانىلمايتىن ورتا ەمەس. تىكەلەي ەفير كەزىندە دە جاسالعان كەز كەلگەن قۇقىققا قايشى ارەكەتكە زاڭ اياسىندا ءتيىستى باعا بەرىلىپ، كىنالى تۇلعالار قولدانىستاعى زاڭناماعا سايكەس جاۋاپكەرشىلىككە تارتىلادى، — دەپ مالىمدەدى اتىراۋ وبلىستىق پ د باسپا ءسوز قىزمەتى.
بۇعان دەيىن اتىراۋدا كامەلەتكە تولماعان قىزىنىڭ الەۋمەتتىك جەلىدەگى ارەكەتى ءۇشىن اناسى اكىمشىلىك جاۋاپكەرشىلىككە تارتىلعانىن جازعان ەدىك.
اۆتورلار
ءنۇربيبى تەمىرتاسوۆا