اتىراۋ وبلىسىندا توتەنشە جاعداي جاريالاندى

اتىراۋ. KAZINFORM - اتىراۋ وبلىسىندا تابيعي سيپاتتاعى توتەنشە جاعداي جاريالاندى. بۇگىن وبلىس اكىمى وسىنداي شەشىم قابىلدادى.

«اتىراۋ وبلىسىنىڭ اۋماعىندا تابيعي سيپاتتاعى توتەنشە جاعداي جاريالانسىن. وبلىس اكىمىنىڭ جەتەكشىلىك ەتەتىن ورىنباسارى تابيعي سيپاتتاعى توتەنشە جاعدايدى جويۋ باسشىسى بولىپ تاعايىندالسى. وعان تابيعي سيپاتتاعى توتەنشە جاعدايدى جويۋعا باعىتتالعان ءىس-شارالاردى جۇرگىزۋ تاپسىرىلسىن»، - دەلىنگەن وبلىس اكىمىنىڭ شەشىمىندە.

بۇعان دەيىن مۇنداي توتەنشە جاعداي قىزىلقوعا جانە جىلىوي اۋدانىندا جاريالانعان. ءقازىر ەكى اۋداندا دا توتەنشە جاعداي ساقتالىپ وتىر.

وبلىستىق جەدەل شتابتىڭ مالىمەتىنشە، قۇلسارى قالاسىنداعى «اتىراۋ»، «دوستىق»، «ميراس»، «جادىراسىن»، «مەرەي»، «شۇعىلا»، مەشىت ماڭى اۋىلىنان 31-ناۋرىزدان بەرى 29545 ادام قاۋىپسىز جەرگە ەۆاكۋاتسيالانعان. ونىڭ 7396 سى بالا. ەۆاكۋاتسيالىق پۋنكتتەرگە 8011 ادام ورنالاستىرىلدى. ولاردىڭ 4578 ى - بالالار.

ەسكە سالا كەتەلىك، بۇدان بۇرىن اتىراۋ وبلىسىندا ەۆاكۋاتسيالاۋ ءۇشىن 15 مىڭ ورىن دايىندالعانىن جازعان ەدىك.

تاسقىن سۋ قاۋپى قۇلسارى قالاسىنىڭ 7 شاعىن اۋدانىنا ءتونىپ تۇرعانىن حابارلاعان بولاتىنبىز.

«تەڭىز» كەنىشىندەگى ۆاحتالىق قالاشىققا 6,5 مىڭنان استام ادام ەۆاكۋاتسيالاندى.