اتىراۋ وبلىسىندا سۋ تاسقىنىنىڭ قاۋپى ءالى تولىق سەيىلمەي تۇر

اتىراۋ. KAZINFORM - اتىراۋ وبلىسىنداعى سۋ تاسقىنىنىڭ قاۋپىن سەيىلتۋ ءۇشىن ادام كۇشى مەن ارنايى تەحنيكالار قاجەت. اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ مالىمەتىنە سۇيەنسەك، تاسقىن سۋدىڭ قاۋپىن سەيىلتۋ ءۇشىن اۋىلدار ماڭىندا بوگەت نىعايتىلىپ جاتىر. وعان مەكەمەلەردىڭ قىزمەتكەرلەرى مەن ەرىكتىلەر تارتىلعان.

«الايدا، سۋ دەڭگەيى ساعات سايىن كوتەرىلىپ، ويىل وزەنىنىڭ بويىندا ورنالاسقان اۋىلدىق وكرۋگتەرگە قاۋىپ ءتوندىرىپ تۇر. وسىعان بايلانىستى قول كۇشى مەن ارنايى تەحنيكالار قاجەت.

قازىر وبلىستىق جەدەل شتابتىڭ جۇمىسى بىرنەشە باعىت جۇرگىزىلىپ وتىر. بىرىنشىدەن، وبلىس اكىمىنىڭ ورىنباسارى قايرات نۇرتايەۆ قىزىلقوعا اۋدانىنا بارىپ، تاسقىن سۋعا قارسى جۇمىستارعا باسشىلىق ەتۋدى قولعا الدى»، - دەپ حابارلادى جاسۇلان بيسەمبيەۆ.

اكىم ورىنباسارىنىڭ دەرەگىنە سۇيەنسەك، ويىل وزەنىندەگى سۋ دەڭگەيى 2 ەسە تومەندەگەن. ءبىراق، وزەن جاعالاۋىنان اسقان سۋ قونىس تانۋ، تايسويعان، قاراباۋ اۋىلدارىنا جەتكەن.

فوتو: جاسۇلان بيسەمبيەۆ

«قونىس تانۋ اۋىلىنا بوگەتتى نىعايتۋ جۇمىستارى ءۇشىن 50 قۇتقارۋشى، 20 ەرىكتى، 1,5 مىڭ قاپ پەن قاجەتتى قۇرال- جابدىقتار جىبەرىلدى. تايسويعان جانە قاراباۋ اۋىلدارىنا دا 60 قۇتقارۋشى باردى. جۇمىستار تاۋلىك بويى جۇرگىزىلەدى»، - دەپ ءمالىم ەتتى جاسۇلان بيسەمبيەۆ.

ەندى جايىق وزەنىندەگى سۋ دەڭگەيى باقىلاۋعا الىنعان.

«جەدەل شتاب رەسەيدىڭ ورىنبور وبلىسىنداعى يريكلينسك سۋ قويماسىنداعى جاعدايدى باقىلاۋدا ۇستايدى. قولداعى اقپاراتقا سايكەس، 1-ساۋىردە يريكلينسك سۋ قويماسىنان جىبەرىلەتىن سۋ كولەمى سەكۋندىنا 90 دان 390 تەكشە مەترگە دەيىن ارتتىرىلعان. وسىعان بايلانىستى وبلىس اكىمى سەرىك شاپكەنوۆ جايىق وزەنىنىڭ يندەر، ماحامبەت اۋداندارى مەن اتىراۋ قالاسىنداعى جاعالاۋىنا ينەرتتى ماتەريالداردى توسەپ، قۇم تولتىرىلعان قاپپەن بەكىتۋدى تاپسىردى»، - دەيدى وبلىس اكىمىنىڭ ورىنباسارى.

ونىڭ مالىمەتىنشە، جىلىوي اۋدانىنداعى جەم وزەنىنە دە نازار اۋدارىلىپ وتىر. مۇنداعى جەم- اقكيىزتوعاي گيدروبەكەتىندەگى سۋ دەڭگەيى كۇندىزگى ساعات 8:00 دەن 20:00 گە دەيىن 55 س م-گە كوتەرىلگەن. قازىر سۋ دەڭگەيى - 3 مەتر 25 س م.

«جىلىوي اۋدانىنا وبلىس اكىمىنىڭ ورىنباسارى مارات مۋرزيەۆ باردى. وبلىس اكىمىنىڭ تاپسىرماسىمەن جەرگىلىكتى اتقارۋشى ورگاندى، توتەنشە جاعداي قىزمەتكەرلەرىن، «ەمبى مۇنايگاز»، «تەڭىزشەۆرويل» جانە مەردىگەر كومپانيالاردى بوگەتتى نىعايتۋ جۇمىسىنا جۇمىلدىرىلدى»، - دەيدى جاسۇلان بيسەمبيەۆ.

ەسكە سالا كەتەلىك، بۇدان بۇرىن اتىراۋ وبلىسىنداعى ءبىر اۋداندا توتەنشە جاعداي جاريالانعانىن حابارلاعان ەدىك.

كەيىن ويىل وزەنىندەگى سۋ تاسقىنىنا بايلانىستى ميالى اۋىلىنان 559 تۇرعىن ەۆاكۋاتسيالاندى.

سونداي-اق، ميالى اۋىلىنا تىرەلگەن سۋدىڭ دەڭگەيى 1 مەتر 20 س م قۇرادى.

ويىل وزەنىنىڭ ماڭىنان 7 شارۋا قوجالىعى قاۋىپسىز اۋماققا كوشىرىلدى.

ميالى اۋىلىن تاسقىن سۋدان قورعاۋ جالعاسىپ جاتقانىن جازعان ەدىك.

ويىلدىڭ ارناسىنان اسقان سۋ ميالى اۋىلى ماڭىنداعى كوپىردى بۇزىپ كەتتى.

ال، بۇگىن اتىراۋ وبلىسىنداعى كوزدىقارا اۋىلىنىڭ تۇرعىندارىن ەۆاكۋاتسيالاۋ باستالدى.

سونداي-اق، كەشە سۋ تاسقىنىنان قىزىلقوعا اۋدانىنداعى 8 وكرۋگكە ءالى دە قاۋىپ بار ەكەنىن حابارلادىق.

اۆتور

جولداسبەك شوپەعۇل