اتىراۋ وبلىسىندا قاڭتاردان بەرى ءورتتىڭ سالدارىنان 11 ادام قازا تاپقان

  اتىراۋ. KAZINFORM - اتىراۋ وبلىسىندا قاڭتاردان بەرى ءورتتىڭ سالدارىنان 11 ادامنىڭ قازا تاپقانى تىركەلگەن.

اتىراۋ وبلىستىق توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسىنىڭ باستىعى، ازاماتتىق قورعاۋ پودپولكوۆنيگى ناريمان وتەشوۆتىڭ مالىمەتىنە سۇيەنسەك، جىل باسىنان بەرى 121 ءورت وقيعاسى تىركەلىپ وتىر.

«بۇل كورسەتكىش وتكەن جىلمەن سالىستىرعاندا 3 پايىزعا ءوستى. جىل باسىنان بەرى ءورتتىڭ باسىم بولىگى - 56 دەرەك تۇرعىن ءۇي سەكتورىندا تىركەلدى. سونىمەن بىرگە، 40 كولىك ورتەندى. جالىننىڭ سالدارىنان 11 ادام اجال قۇشتى. ال، 6 ادام كۇيىك الىپ، زارداپ شەكتى. ءورتتىڭ تۇتانۋىنىڭ بىرنەشە سەبەبى بار. بىرىنشىدەن، ەلەكتر اسپاپتارىن مونتاجداۋ جانە تەحنيكالىق ەرەجەلەرىن بۇزۋمەن بايلانىستى بولىپ وتىر. ەكىنشىدەن، وتتى قولدانۋ كەزىندەگى ابايسىزدىق تا سەبەپ بولادى. ۇشىنشىدەن، پەشتەردى پايدالانۋ كەزىندە ءورت قاۋىپسىزدىگى ەرەجەلەرى دۇرىس ساقتالمايدى. تورتىنشىدەن، بالالاردىڭ وتپەن ويناۋى دا ءورتتىڭ تۇتانۋىنا اسەر ەتەدى»، - دەپ حابارلادى ناريمان وتەشوۆ.

ەسكە سالا كەتەلىك، بيىلعى ساۋىردە اتىراۋ وبلىسىنداعى يندەربور كەنتىندە ورتتەن ەكى بالا مەرت بولعانىن حابارلاعان ەدىك.

كەيىن ەكى بالانىڭ ءومىرىن قيعان ورتكە بايلانىستى كۇدىكتى قاماۋعا الىندى. ال، ورتەنگەن پاتەردەن جانارماي ءيىسى بار قۇتى تابىلعانىن جازعان بولاتىنبىز.