اتىراۋ وبلىسىندا قاراقۇرت شاققان 485 تۇيەنىڭ توقسانى ولگەن

 اتىراۋ. KAZINFORM - اتىراۋ وبلىسىندا 485 تۇيەنى قاراقۇرت شاققان. ويسىلقارا تۇقىمىنىڭ 90 ى ولگەنى انىقتالعان.

وبلىستىق اۋىل شارۋاشىلىعى باسقارماسىنىڭ مالىمەتىنشە، بيىل ەلدى مەكەندەردە ۋلى قاراقۇرت كوبەيگەن.

«اتىراۋ وبلىسىنىڭ اۋماعىندا ماۋسىم-شىلدە ايلارىندا 485 تۇيەنى قاراقۇرت شاقتى. سونىڭ سالدارىنان 90 تۇيە شىعىن بولدى. سيمپتوماتيكالىق ەمدەۋ شارالارىنىڭ ناتيجەسىندە 306 جانۋار ساۋىقتى. ال 89 تۇيەگە ءالى دە ەمدەۋ جۇرگىزىلىپ جاتىر. قاراقۇرت شاققانان ولگەن مالدىڭ يەلەرىنە 65 211,2 مىڭ تەڭگە تولەندى»، - دەپ حابارلادى اۋىل شارۋاشىلىعى باسقارماسىنان.

باسقارمانىڭ مالىمەتىنشە، ۋلى جاندىكتەردىڭ شاعۋىنىڭ الدىن الۋ، ەمدەۋ جانە ولگەن جانۋارلارعا وتەماقى تولەۋ بيۋدجەت قارجىسى ەسەبىنەن قاراستىرىلماعان. الايدا، سوعان قاراماستان جەرگىلىكتى ۆەتەرينارلار ۋلى جاندىك شاققان مالدى ەمدەۋ شارالارىن كۇندەلىكتى جۇرگىزىپ جاتىر.

«ۋلى ناسەكومداردى جويۋدى بيۋدجەت قارجىسى ەسەبىنەن اتقارىلاتىن ءىس-شارالار تىزبەسىنە قوسۋ بويىنشا شارالار قابىلداۋ تۋرالى اۋىل شارۋاشىلىعى مينيسترلىگىنە حات جولداندى. مال يەلەرىنە ۋلى جاندىكتەر كوپ تاراعان جايىلىمدا تۇيە، جىلقى جانە سيىردى جايۋدان باس تارتۋدى، اۋرۋ بەلگىلەرى بىلىنگەن جانۋارلار تۋرالى جەدەل تۇردە ۆەتەرينارلارعا حابارلاۋ، سونداي- اق ەمدەۋ شارالارى جۇرگىزىلىپ جاتقان جانۋارلاردى كۇتىپ-باعۋ ەرەجەلەرىن قاتاڭ ساقتاۋ ەسكەرتىلدى»، - دەپ ءمالىم ەتتى باسقارمادان.

ەسكە سالا كەتەلىك، بۇعان دەيىن قاراقۇرت شاققان اتىراۋلىق ازاماتقا كورشى ەل اۋرۋحاناسىندا كومەك كورسەتىلگەنىن جازعان بولاتىنبىز.

سونداي-اق، اتىراۋدا قاراقۇرت شاققان 13 ادام اۋرۋحاناعا تۇسكەن ەدى.