اتىراۋ وبلىسىندا جات اعىمداعى 37 ادام تەرىس ءدىني اقپارات تاراتقان

اتىراۋ. KAZINFORM - اتىراۋ وبلىسىندا جات اعىمداعى 37 ادامعا تەرىس ءدىني اقپاراتتى تاراتقانى ءۇشىن ايىپپۇل سالىندى.

اتىراۋ وبلىستىق ءدىن ىستەرى باسقارماسىنىڭ باسشىسى قاھارمان مۇسايەۆتىڭ مالىمەتىنە سۇيەنسەك، 2 مىڭنان استام ادامدى ءدىني تەرىس اعىمنىڭ جەتەگىنەن شىعارۋ ءۇشىن ءتيىستى جۇمىس جۇرگىزىلگەن.

«كەز كەلگەن ادامنىڭ كوزقاراسىن، ۇستانىمىن وزگەرتۋگە ىقپال ەتۋ وڭاي ەمەس. اسىرەسە، تەرىس ءدىني اعىمنىڭ جەتەگىندەگى ادامداردى رايىنان قايتارۋ ءۇشىن 1 جىلداي مەرزىم قاجەت. وسى ورايدا ءدىن سالاسىنىڭ ماماندارى ءتۇسىندىرۋ جانە وڭالتۋ جۇمىستارىنا باسىمدىق بەرىپ وتىر. سونىڭ ناتيجەسىندە 88 ادام تەرىس ءدىني اعىمنىڭ شىرماۋىنان شىعىپ، كوزقاراسىن وزگەرتتى»، - دەيدى قاھارمان مۇسايەۆ.

ونىڭ دەرەگىنە قاراعاندا، 37 ادامعا 50 ايلىق ەسەپتىك كورسەتكىش مولشەرىندە ايىپپۇل سالىنعان. ويتكەنى، ولار ق ر ءدىني قىزمەت جانە ءدىني بىرلەستىكتەر تۋرالى زاڭنىڭ تالابىن بۇزعان.

ەسكە سالا كەتەلىك، بۇدان بۇرىن قاھارمان مۇسايەۆ اتىراۋ وبلىسى ءدىن ىستەرى باسقارماسىنا باسشى بولعانىن حابارلاعان ەدىك.

قاھارمان مۇسايەۆ 1982 -جىلى اتىراۋ وبلىسىندا دۇنيەگە كەلگەن. تۇركيا رەسپۋبليكاسىنداعى سەلچۋك ۋنيۆەرسيتەتىن تەولوگ، باتىس قازاقستان يننوۆاتسيالىق-تەحنولوگيالىق ۋنيۆەرسيتەتىن قۇقىقتانۋ ماماندىعىمەن بىتىرگەن.

2012 -جىلدىڭ سوڭىنان بەرى اتىراۋ وبلىستىق ءدىن ىستەرى باسقارماسىندا ءتۇرلى باسشىلىق لاۋازىمدى اتقارعان.

اۆتور
جولداسبەك شوپەعۇل