اتىراۋ وبلىسىندا ءۇش ايدا سۋعا باتقان 25 ادامنىڭ 14 ى - جاس ءوسپىرىم
اتىراۋ. KAZINFORM - اتىراۋ وبلىسىندا كەيىنگى ءۇش ايدا سۋ ايدىندارىنا 25 ادامنىڭ باتقانى انىقتالىپ وتىر. ونىڭ ىشىندە 14 جاس ءوسپىرىم بار.
بۇل ماسەلەگە اتىراۋ وبلىسىنىڭ اكىمى سەرىك شاپكەنوۆتىڭ توراعالىعىمەن ارنايى جيىندا نازار اۋدارىلدى. وبلىس اكىمى اپپاراتىنىڭ باقىلاۋ جانە تالداۋ ءبولىمى باسشىسىنىڭ مىندەتىن اتقارۋشى سايان مەدەنوۆتىڭ ايتۋىنشا، بيىل سۋعا باتقانداردىڭ سانى ارتقان.
«اتىراۋ وبلىسىندا كەيىنگى ءۇش ايدا 25 ادام سۋعا باتىپ كەتتى. ونىڭ ىشىندە 14 جاس ءوسپىرىم بار. سۋعا باتقانداردىڭ سانى بىلتىرعىمەن سالىستىرعاندا ەكى ەسەگە ءوستى. جازاتايىم وقيعا اتا-انالاردىڭ بالا قاۋىپسىزدىگىنە سالعىرت قاراۋىنان بولىپ وتىر. اسىرەسە، اتىراۋ قالاسى مەن قۇرمانعازى اۋدانىندا سۋعا باتۋ دەرەگى ءجيى تىركەلەدى. قاۋىپسىزدىك تۋرالى ءتۇسىندىرۋ جۇمىسىنا بايلانىستى الەۋمەتتىك جەلىگە مونيتورينگ جۇرگىزدىك. سۋداعى قاۋىپسىزدىك تۋرالى ءتۇسىندىرۋ جۇمىسىنىڭ 90 پايىزىن توتەنشە جاعدايلار دەپارتامەنتى مەن پوليتسيا قىزمەتكەرلەرى عانا جۇرگىزىپ كەلەدى. ال، وبلىس، قالا جانە اۋدان اكىمدىكتەرىنىڭ رەسمي پاراقشاسىندا جازبا، نە بەينەروليكتەر جۇكتەلمەگەن. شومىلۋ ماۋسىمى باستالماعانى تۋرالى جان-جاقتى تۇسىنىك جۇرگىزىلمەگەن»، - دەدى سايان مەدەنوۆ.
پوليتسيا دەپارتامەنتى باستىعىنىڭ ءبىرىنشى ورىنباسارى ءابدىعاني سەيدۋاليەۆتىڭ ايتۋىنشا، جاز باستالعالى بەرى 154 ادام اكىمشىلىك جاۋاپكەرشىلىككە تارتىلعان. ال، 48 اتا-انا تىيىم سالىنعان ورىنداردا شومىلعانى انىقتالعان. جاعالاۋدا ماس كۇيىندە جۇرگەن 54 ادامعا 1 ميلليون 69 مىڭ 740 تەڭگە ايىپپۇل سالىنعان.
وبلىس اكىمى سەرىك شاپكەنوۆتىڭ پىكىرىنشە، جازاتايىم وقيعالارعا تالداۋ جۇرگىزىپ، الدىن الۋ ءۇشىن ءىس-شارالارىنىڭ جوسپارىن ازىرلەگەن ءجون.
«ادامنىڭ ومىرىنەن قىمبات نارسە جوق. اسىرەسە، بالالاردىڭ قاۋىپسىزدىگى باستى نازاردا بولۋعا ءتيىس. بۇرىن كوشەدە قايعىلى وقيعالاردىڭ الدىن الۋ تۋرالى باننەر ءىلىنىپ، الەۋمەتتىك جەلىدە بەينەروليكتەر تارالاتىن ەدى. قازىر مۇنداي جوق. دەمەك، اكىمدىكتەر نەمقۇرايلىق تانىتادى. مەكتەپتەردە وقۋشىلارعا سىنىپ ساعاتىن جۇرگىزىپ، اتا-انالارعا زامانۋي بايلانىس قۇرالدارى ارقىلى ءتۇسىندىرۋ قاجەت. توتەنشە جاعدايلار جانە پوليتسيا دەپارتامەنتتەرى ەرىكتىلەرمەن بىرگە سۋ ايدىندارىنىڭ قاۋىپتى تۇستارىن انىقتاۋى كەرەك. وسىعان ورايپوليتسيانىڭ جەدەل توپتارىن كوبەيتىپ، تۇرعىندارعا اقپارات تاراتۋعا قوعام بەلسەندىلەرىن تارتقان ءجون. اۋىلدىق وكرۋگتەردىڭ اكىمدەرى تۇرعىندارعا قاۋىپتى نۇكتەلەر تۋرالى ءجيى حابارلاپ وتىرۋى كەرەك»، - دەدى سەرىك شاپكەنوۆ.
ەسكە سالا كەتەلىك، بۇعان دەيىن اتىراۋ وبلىسىندا جاز باستالعالى سۋعا باتقان توعىز ادامنىڭ تورتەۋى بالا ەكەنىن جازعان بولاتىنبىز.
اۆتور
جولداسبەك شوپەعۇل