اتىراۋ وبلىسىندا اپتاپ ىستىقتان بالىقتىڭ جاپپاي قىرىلۋ قاۋپى بار

اتىراۋ. KAZINFORM - اتىراۋ وبلىسىندا اپتاپ ىستىقتىڭ بەتى قايتپاي تۇر. بۇل قىزىلجار اۋىلىنىڭ ماڭىنداعى كانالدا بالىقتىڭ جاپپاي قىرىلۋ قاۋپىن تۋعىزىپ تۇر.

جايىق-كاسپي وبلىسارالىق باسسەيندىك بالىق شارۋاشىلىعى ينسپەكسياسىنىڭ مالىمەتىنە سۇيەنسەك، سارىوزەك كانالىنا باقىلاۋ، قاداعالاۋ جۇمىسى جۇرگىزىلگەن.

اتىراۋ قالاسىنان رەسەي فەدەراتسياسىنىڭ استراحان وڭىرىنە دەيىنگى شەكاراعا دەيىن قاتىنايتىن تراسسا بويىنداعى كانال جاعالاۋىندا ءار جەردە قارابالىق تۇقىمداس بالىقتىڭ 2-3 دانادان ولەكسەسى بايقالعان.

«جولداعى اۆتوكولىك كوپىرىنىڭ وڭ جاعىندا 1 شاقىرىمداي قاشىقتىقتاعى سارىوزەك كانالى جاعالاۋىندا ءتىرى بالىق شاباقتارى وتە كوپ. ال، قىزىلجار ەلدى مەكەنى تۇسىندا كانال بويى جارىلىپ، كوپ مولشەردەگى سۋ دالاعا جايىلىپ جاتىر. اۋا تەمپەراتۋراسىنىڭ ىسۋىنا بايلانىستى سۋدى توقتاتۋ كەرەك»، - دەپ حابارلادى وبلىسارالىق ينسپەكسيادان.

فوتو: جايىق- كاسپي وبلىسارالىق باسسەيندىك بالىق شارۋاشىلىعى ينسپەكسياسى

ينسپەكسياعا قاراستى اتىراۋ بالىق ينسپەكسياسى ءبولىمىنىڭ ماماندارى ارنايى اپپاراتتارمەن سۋداعى وتتەگى مولشەرىنە، سۋدىڭ تەمپەراتۋراسىنا تالداۋ جۇرگىزدى.

«سۋداعى وتتەگىنىڭ ۇلەسى - 3,1- 3,8 م گ/دم³، سۋدىڭ تەمپەراتۋراسى - 29 گرادۋس، تەرەڭدىگى - 60-70 س م. بالىقتاردىڭ جاپپاي تۇنشىعۋ، قىلىلۋ فاكتىسى انىقتالعان جوق. الايدا، كانالداعى سۋدىڭ تايىزدانۋىنا بايلانىستى بالىقتاردىڭ جاپپاي قىرىلۋ، تۇنشىعۋ قاۋپى بار»، - دەپ ءمالىم ەتتى اتالعان ينسپەكسيادان.

اۆتور
جولداسبەك شوپەعۇل