اتىراۋ وبلىسىندا اسا قاۋىپتى مال اۋرۋىنىڭ ءۇش وشاعى انىقتالعان

اتىراۋ. KAZINFORM - اتىراۋ وبلىسىندا اسا قاۋىپتى مال اۋرۋىنىڭ ءۇش وشاعى انىقتالعان. اۋرۋ وشاقتارى يندەر مەن قۇرمانعازى اۋدانىنان تابىلعان.

اتىراۋ وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى امانگەلدى سالاماتتىڭ ايتۋىنشا، اسا قاۋىپتى اۋرۋ وشاقتارىندا شەكتەۋ جانە كارانتين شارالارى بەلگىلەنگەن. سوعان سايكەس ءتيىستى جۇمىستار اتقارىلعان.

«بيىل بەكىتىلگەن جوسپارعا سايكەس وڭىردەگى ءتورت تۇلىككە اسا قاۋىپتى 11 ءتۇرلى اۋرۋعا قارسى 3 ميلليون 551 مىڭ 758 دوزا ۆاكسينا ەگىلدى. برۋتسەللەز اۋرۋىنا بايلانىستى 1 ميلليون 50 مىڭ 940 قان سىناماسى الىندى. سىناما قورىتىندىسىمەن انىقتالعان اۋرۋ مال يەلەرىنە جەرگىلىكتى بيۋدجەت ەسەبىنەن ءتيىستى وتەماقى تولەندى»، - دەدى امانگەلدى سالامات.

ونىڭ ايتۋىنا قاراعاندا، وبلىس اۋماعىندا سوڭعى ءۇش جىلدا ۋلى قاراقۇرت كوبەيگەن. قاراقۇرتتان ءتورت تۇلىك، ونىڭ ىشىندە تۇيە كوپ زارداپ شەككەن.

«ماۋسىم- شىلدە ايلارىندا 485 تۇيەنى قاراقۇرت شاقتى. سونىڭ سالدارىنان 90 تۇيە ءولدى. ال، 306 تۇيە سيمپتوماتيكالىق ەمدەۋدەن كەيىن ساۋىقتى. قازىر 89 تۇيەگە ەمدەۋ شارالارى جۇرگىزىلىپ جاتىر. ولگەن مال يەلەرىنە 65 ميلليون تەڭگەدەن استام شىعىن كەلتىرىلدى. اتالعان جاعداي جىل سايىن كوبەيىپ، مال يەلەرى تاراپىنان الاڭداۋشىلىق تۋىنداپ وتىر»، - دەپ ءمالىم ەتتى امانگەلدى سالامات.

ەسكە سالا كەتەلىك، بۇعان دەيىن اتىراۋ وبلىسىندا قاراقۇرت شاققان 485 تۇيەنىڭ توقسانى ولگەنىن حابارلاعان بولاتىنبىز.

اۆتور

جولداسبەك شوپەعۇل