اتىراۋ وبلىسىندا افريكالىق جايىننىڭ شاباعى ءوسىرىلىپ جاتىر
اتىراۋ. KAZINFORM - اتىراۋ وبلىسىندا افريكالىق جايىننىڭ شاباعىن ءوسىرۋ قولعا الىندى. ماۋسىم ايىنان بەرى سۋ توعانىندا 10 توننا بالىق وسىرىلگەن.
قۇرمانعازى اۋدانى اكىمىنىڭ ورىنباسارى قايرات بولەكوۆتىڭ ايتۋىنشا، مۇنداي كورسەتكىش سوڭعى 30 جىلدا بولماعان.
«سۋ توعانىندا بالىق وسىرەتىن شارۋاشىلىقتارعا قولداۋ كورسەتىپ، اۋدان ورتالىعىندا بالىق ونىمدەرىن ساتاتىن ورىن اشۋدى جوسپارلاپ وتىرمىز. قازىر اتىراۋ مەن استراحان وبلىستارى اراسىندا ءوزارا مەموراندۋم جاسالعان. ونىمدەر استراحان قالاسىنا كەدەرگىسىز وتەدى»، - دەيدى قايرات بولەكوۆ.
ونىڭ ايتۋىنا قاراعاندا، افريكالىق جايىن شاباعىن «ابدۋلوۆ. ب» شارۋا قوجالىعى سۋ توعانىندا ءوسىرۋدى قولعا العان.
«بيىل ماۋسىمدا اقتاۋ قالاسىنان 25 گرامدىق افريكالىق كلاريەلىك جايىن شاباقتارىن اكەلىپ، ەكى توعانعا جىبەردىك. شاباقتىڭ سالماعىن 700-1200 گرامعا دەيىن جەتكىزىپ، اعىن سۋ بويىنداعى تورعا سالدىق. مۇندا بىرنەشە كۇن ساقتاپ، تسەحتا قاتىرامىز. بالىق تورلارىنىڭ ەنى مەن ۇزىندىعى - 5 مەتر، تەرەڭدىگى - 2,5 مەتر. الداعى ۋاقىتتا 20 توننا بالىق شىعارۋدى قولعا الامىز»، - دەيدى شارۋا قوجالىعىنىڭ جەتەكشىسى بولات ابدۋلوۆ.
شارۋانىڭ مالىمەتىنە سۇيەنسەك، افريكالىق كلاريەلىك جايىننىڭ سالماعى 3 تەن 5 كەلىگە دەيىن تارتادى. ءدامى تاۋىق ەتىنە ۇقسايتىن بالىقتىڭ بۇل تۇرىنە سۇرانىس كوپ.
ەسكە سالا كەتەلىك، بۇعان دەيىن اتىراۋ وبلىسىندا ماۋسىم ايىنان بەرى 89,4 ميلليون بالىق شاباعى قۇتقارىلعانىن حابارلاعان ەدىك.