اتىراۋ وبلىسىنا شەتەلدەن 169 ەتنيكالىق قازاق كوشىپ كەلدى
اتىراۋ. KAZINFORM - اتىراۋ وبلىسىنا جىل باسىنان بەرى شەت مەملەكەتتەردەن 169 قانداس قونىس اۋداردى. قانداستار اتىراۋ قالاسىنا، جىلىوي، قۇرمانعازى جانە ماقات اۋدانىنا قونىستاندى.
اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلبولات امانعاليەۆانىڭ ايتۋىنشا، جىل باسىنان بەرگى 6 ايدا شەتەلدەن 122 وتباسى تۇراقتى تۇرۋ ماقساتىندا قونىس اۋدارعان.
- قانداستاردىڭ باسىم بولىگى - 127 ادام وزبەكستان رەسپۋبليكاسىنان كوشىپ كەلدى. رەسەي فەدەراتسياسىنان 22 ادام، تۇرىكمەنستان پەسپۋبليكاسىنان 12 ادام، قىتاي حالىق رەسپۋبليكاسىنان 7 ادام جانە موڭعوليادان 1 ادام قونىس اۋدارىپ وتىر. ولاردىڭ 153 ى اتىراۋ قالاسىنا، 7 ەۋى جىلىوي اۋدانىنا، 8 ادام قۇرمانعازى اۋدانىنا، 1 ەۋى ماقات اۋدانىنا ورنالاستى، - دەيدى گۇلبولات امانعاليەۆا.
بيىل اتىراۋ وبلىسىندا قانداستاردى قابىلداۋدىڭ وڭىرلىك كۆوتاسى اياسىندا 100 ادامعا كۆوتا بولىنگەن. وسى كەزگە دەيىن كوميسسيا شەشىمىمەن 56 وتباسى (90 ادام) كۆوتا العان.
- كۆوتا العانداردىڭ اراسىندا وزبەكستاننان 63 ادام، قىتايدان - 10، رەسەيدەن - 10، تۇرىكمەنستاننان 7 قانداس بار. قانداستاردىڭ كوشى-قون شىعىندارىن وتەۋ ءۇشىن 81 ادامعا 70 ايلىق ەسەپتىك كورسەتكىش مولشەرىندە 22 ميلليون 294 مىڭ 440 تەڭگە كولەمىندە ءبىرجولعى الەۋمەتتىك تولەم بەرىلدى. ال، 6 وتباسى قۇرامىنداعى 13 ادامعا تۇرعىن ءۇي جالداۋعا جانە كوممۋنالدىق تولەمدەر ءۇشىن 20-25 ايلىق ەسەپتىك كورسەتكىش مولشەرىندە 727 مىڭ 420 تەڭگە كولەمىندە اي سايىنعى جاردەماقى تاعايىندالدى، - دەپ حابارلادى گۇلبولات امانعاليەۆا.
ونىڭ دەرەگىنە قاراعاندا، زاڭدا كورسەتىلگەن مەرزىمگە سايكەس 15 قانداستىڭ مارتەبەسى 6 ايعا ۇزارتىلعان. ونىڭ ىشىندە 13 قانداس وزبەكستاننان، 1 ەۋى موڭعوليادان، تاعى 1 ادام تۇرىكمەنستاننان كەلگەن.
- قازىر اتىراۋ وبلىسىندا قانداستاردى ۋاقىتشا ورنالاستىرۋ ورتالىعى تۇراقتى جۇمىس ىستەيدى. ماقساتىمىز - ەلگە ورالعان قانداستاردىڭ جاڭا ورتاعا بەيىمدەلۋىنە جاسالعان ناقتى قولداۋ كورسەتۋ. مانساپ ورتالىقتارىنا جۇگىنگەن 10 قانداستىڭ 5 ەۋى الەۋمەتتىك قولداۋعا يە بولدى. ەكەۋى تۇراقتى جۇمىسقا، 2 ادام قوعامدىق جۇمىسقا ورنالاستىرىلىپ، 1 ادام قايتا دايارلاۋ كۋرسىنا جىبەرىلدى، - دەپ ءمالىم ەتتى گۇلبولات امانعاليەۆا.