ولاردىڭ ايتۋىنشا، ادام كوپ جۇرەتىن جەرلەردە بەلگى جەتىسپەيدى، ال قالا شەتىندەگى كەي كوشەلەردە كەرىسىنشە تىم كوپ ورناتىلعان.
قالا تۇرعىندارىنىڭ سوزىنشە، كولىك اعىنى كوپ، قاۋىپ باسىم جەردە جاياۋ جۇرگىنشىلەر بەلگىسى سيرەك ورنالاسقان. ال اكىمدىك قالا شەتىندەگى جادىراسىن اۋىلىنداعى كوشەلەردىڭ بىرىنە ونداعان مەتر سايىن ارنايى بەلگى قويعان. ناقتىراق ايتقاندا، شەتكى اينالما جول ەسەپتەلەتىن، ۇزىندىعى 2,8 شاقىرىم بولاتىن كوشەنىڭ ءبىر جاق بەتىنە 14 جاياۋ جۇرگىنشىلەرگە ارنالعان جول بەلگىسى ورناتىلىپتى.
- جولدىڭ ءبىر شەتىنە 2024 -جىلى تاسقىن كەزىندە بوگەت سوعىلدى. بالالارعا، ۇلكەن كىسىلەرگە كەرەك جەرگە قويىلماي، وسى اۋماققا ورناتقان. بۇل كوشەگە نە ءۇشىن سالىنعانىن تۇسىنبەيمىز، اۋماق تىپ- تىنىش، ءجۇرىپ جاتقان ادامدى بايقامايمىز، - دەپ پىكىر ءبىلدىردى قالا تۇرعىنى.
بۇل ماسەلەگە قاتىستى اۋدان اكىمدىگى پىكىر ءبىلدىردى. رەسمي اقپاراتقا سۇيەنسەك، جول بەلگىلەرى بۇل كوشەگە اۋداننىڭ كەشەندى دامۋ ديناميكاسىنا سايكەس الداعى ۋاقىتتا تۇرعىن ءۇي قۇرىلىسى جۇرگىزىلىپ، حالىقتىڭ قونىستانۋى جوسپارلانعان جەرلەردى ەسكەرە وتىرىپ، جوسپارعا سەيكەس الدىن الا ورناتىلعان.
- جول بەلگىلەرىن ورناتۋ كەزىندە قولدانىستاعى جالپى تەحنيكالىق تالاپتار، ونىڭ ىشىندە قر ست 1125-2002 ستاندارتىنىڭ تالاپتارى باسشىلىققا الىندى جانە جوبا مەملەكەتتىك ساراپتامانىڭ وڭ قورىتىندىسىن العان. تۇرعىندار تاراپىنان اتالعان ماسەلەنىڭ ءجيى كوتەرىلگەنىن ەسكەرىپ جىلىوي اۋدانىنىڭ پوليتسيا باسقارماسىنىڭ اكىمشىلىك- تەحنيكالىق قاداعالاۋ ينسپەكتورىمەن بىرلەسىپ، قالا ىشىندەگى جاياۋ جۇرگىنشىلەرگە ارنالعان جول بەلگىلەرى ورناتىلماعان ۋچاسكەلەرگە زەردەلەۋ جۇمىستارى جۇرگىزىلىپ، سايكەسىنشە جول بەلگىلەرىنىڭ ورنىن الماستىرۋ جۇمىسى اتقارىلىپ جاتىر، - دەدى جىلىوي اۋدانى جولاۋشىلار كولىگى جانە اۆتوموبيل جولدارى ءبولىمىنىڭ باسشىسى بەكەت بوزجىگىتوۆ.
جاۋاپتى ءبولىم جىلىوي اۋدانىنىڭ پوليتسيا باسقارماسىنان جول بەلگىلەرىن ورناتۋ، اۋىستىرۋ نەمەسە تولىقتىرۋ جونىندە نۇسقاما كەلىپ تۇسكەن جاعدايدا قولدانىستاعى تالاپتارعا سايكەس ءتيىستى جۇمىستار جۇرگىزىلەتىنىن مالىمدەدى.