استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ مالىمەتىنشە، سوتتالۋشى قاراعاندى مەن استانا قالالارىنداعى تۇرعىنداردىڭ سەنىمىنە كىرىپ، ولاردىڭ كولىكتەرىن يەمدەنگەن.
ول ازاماتتارعا اۆتونەسيە راسىمدەۋگە بانكتەن الدىن الا ماقۇلداۋ العان كليەنتتەرى بار ەكەنىن ايتقان. وسى ۇسىنىسقا سەنگەن كولىك يەلەرى اۆتوكولىكتەرىن ءوزى كورسەتكەن ادامداردىڭ اتىنا قاشىقتان قايتا راسىمدەگەن. الايدا سوتتالۋشى كەيىن كولىكتەردىڭ اقشاسىن يەلەرىنە تولەمەي، قاراجاتتى ءوز قاجەتىنە جۇمساعان.
وسىلايشا، التى الاياقتىق دەرەگى بويىنشا جابىرلەنۋشىلەرگە كەلتىرىلگەن جالپى شىعىن 103 ميلليون تەڭگەدەن اسقان.
سوتتا ونىڭ كىناسى جابىرلەنۋشىلەر مەن كۋاگەرلەردىڭ جاۋاپتارى، بەينەجازبالار، بەتتەستىرۋ حاتتامالارى جانە باسقا دا دالەلدەر ارقىلى راستالدى.
سوتتالۋشى قاراعاندى تۇرعىندارىنا قاتىستى تاعىلعان ايىپتى مويىنداماعان. ال استانا تۇرعىندارىنا قاتىستى كىناسىن ءىشىنارا مويىنداپ، كەيبىر ارەكەتتەرىن ماجبۇرلەۋمەن جاساعانىن ايتقان.
سوت ازاماتتى قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگىنىڭ 2) تارماعى بويىنشا كىنالى دەپ تانىدى. بۇل نورما اسا ءىرى مولشەردە جاسالعان الاياقتىق ءۇشىن قىلمىستىق جاۋاپكەرشىلىكتى كوزدەيدى.
ناتيجەسىندە سوتتالۋشى 6 جىل 8 ايعا باس بوستاندىعىنان ايىرىلىپ، وعان قوسىمشا 6 جىل مەرزىمگە اۆتوكولىكتەردى ساتىپ الۋ- ساتۋ سالاسىندا قىزمەتپەن اينالىسۋعا تىيىم سالىندى.
سوت ۇكىمى ازىرگە زاڭدى كۇشىنە ەنگەن جوق.