اتوم ەنەرگياسى جونىندەگى اگەنتتىك پەن «روس اتوم» ا ە س سالۋ جونىندەگى جول كارتاسىن بەكىتتى

استانا. KAZINFORM - سانكت- پەتەربور حالىقارالىق ەكونوميكالىق فورۋمى اياسىندا ق ر اتوم ەنەرگياسى اگەنتتىگىنىڭ ءتوراعاسى الماسادام ساتقاليەۆ پەن «روس اتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچيەۆ قازاقستاندا اتوم ەلەكتر ستانسياسىن سالۋ جوباسىن ىسكە اسىرۋ ماسەلەلەرى بويىنشا كەزدەسۋ وتكىزدى.

الدىمەن جوبانى دايىنداۋ جانە ىسكە اسىرۋ كەزەڭدەرىن قامتيتىن ينديكاتيۆتىك جول كارتاسى بەكىتىلدى. قۇجاتتا ينجەنەرلىك-ىزدەستىرۋ جۇمىستارىن جۇرگىزۋ، EPC- شارت جاساسۋ جانە جوبالىق قۇجاتتامانى ازىرلەۋ كوزدەلگەن.

سونداي-اق «قازاقستاندىق اتوم ەلەكتر ستانسيالارى» ج ش س («ق ا ە س») مەن «روس اتوم» مەملەكەتتىك كورپوراتسياسىنىڭ ينجينيرينگتىك كومپانياسى - «اتوم ستروي ەكسپورت» ا ق اراسىندا الماتى وبلىسىنىڭ جامبىل اۋدانىندا جوبانى ىسكە اسىرۋعا بايلانىستى ىنتىماقتاستىقتىڭ نەگىزگى قاعيداتتارىن ايقىندايتىن نەگىزدەمەلىك كەلىسىمگە قول قويىلدى.

اتالعان ستراتەگيالىق جوبا بەيبىت ماقساتتاعى اتوم ەنەرگياسىن پايدالانۋ سالاسىنداعى مەملەكەتارالىق ىنتىماقتاستىق اياسىندا جۇزەگە اسىرىلادى جانە قازاقستاننىڭ ەنەرگەتيكالىق قاۋىپسىزدىگىن قامتاماسىز ەتۋ مەن ەل ەكونوميكاسىن دەكاربونيزاتسيالاۋ جونىندەگى ستراتەگيالىق مىندەتتەرگە قول جەتكىزۋگە باعىتتالعان. تاراپتار بۇل جوبانىڭ ەلىمىز ءۇشىن ستراتەگيالىق ماڭىزدىلىعىن جانە ونى جەدەل ىسكە اسىرۋ قاجەتتىگىن اتاپ ءوتتى.

- قازاقستاندا اتوم ەلەكتر ستانسياسىن سالاتىن حالىقارالىق كونسورتسيۋمدى باسقارۋ قۇقىعىن سەنىپ تاپسىرعانى ءۇشىن قازاقستان تاراپىنا العىسىمىزدى بىلدىرەمىز. قازاقستان - اتوم سالاسىنداعى ءبىزدىڭ سەنىمدى تاريحي سەرىكتەسىمىز. سەنىمدىلىگى، قاۋىپسىزدىگى جانە تيىمدىلىگى دالەلدەنگەن رەسەيلىك يادرولىق تەحنولوگيالار قازاقستان حالقىنىڭ يگىلىگىنە قىزمەت ەتىپ، ەلدىڭ ەنەرگەتيكالىق ەگەمەندىگىن نىعايتادى دەپ سەنەمىز، - دەدى «روس اتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچيەۆ.

ءوز كەزەگىندە ق ر اتوم ەنەرگياسى جونىندەگى اگەنتتىگىنىڭ ءتوراعاسى الماسادام ساتقاليەۆ قازاقستاندا اتوم ستانسياسىن سالۋ ەلىمىزدىڭ ەنەرگەتيكاسىن ورنىقتى دامىتۋدى قامتاماسىز ەتۋگە باعىتتالعان كەشەندى ستراتەگيانىڭ ءبىرى ەكەنىن ايتتى. ول سونداي-اق قاۋىپسىزدىكتىڭ جوعارى دەڭگەيىن جانە ءوندىرىستى جەرگىلىكتەندىرۋدى قامتاماسىز ەتۋ ءۇشىن سەرىكتەستەرمەن تىعىز ءارى اشىق ىنتىماقتاستىققا سەنىم ارتاتىنىن جەتكىزدى.