اتوم ەلەكتر ستانتسياسى قۇرىلىسىندا حالىقارالىق كونسورتسيۋم ماسەلەسى دە پىسىقتالۋى مۇمكىن

استانا. KAZINFORM - اتوم ەلەكتر ستانتسياسىن (ا ە س) سالىپ بەرگەن ۆەندورعا تاۋەلدى بولىپ قالماۋ ءۇشىن ءوزىمىزدىڭ مامانداردى دايارلايمىز. بۇل تۋرالى ەلوردادا يادرولىق تەحنولوگيالاردىڭ حالىقارالىق كورمەسىندە ق ر ەنەرگەتيكا مينيسترلىگى اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى عۇمار سەرعازين ايتتى.

«ەگەر رەفەرەندۋمدا ا ە س سالۋعا حالىقتىڭ باسىم بولىگى داۋىس بەرسە، وندا ۇكىمەت دەڭگەيىندە ۆەندورلاردى ايقىندايمىز. بۇل تۇرعىدا ولارعا قويىلاتىن ءتيىستى تالاپتار بولادى، ياعني تەحنيكالىق ءارى ەكونوميكالىق كورسەتكىشتەر نازارعا الىنادى. سونىمەن قاتار، بۇل اۋقىمدى جۇمىسقا جەرگىلىكتى وندىرىستەر مەن جۇمىس كۇشىنىڭ تارتىلۋىنا ەكپىن قويىلادى. اتاپ ايتقاندا، ءبىزدىڭ مامانداردىڭ ءبىلىمىن جەتىلدىرۋگە كوڭىل بولىنەدى، سەبەبى كەيىننەن ءبىز اەس سالىپ بەرگەن ۆەندورعا تاۋەلدى بولىپ قالماۋىمىز كەرەك. جالپى، ەلىمىز وتىن شيكىزاتى قورى بويىنشا الدىڭعى ورىندا ەكەنى بەلگىلى»، - دەدى ا. سەرعازين.

ونىڭ ايتۋىنشا، بۇگىن استانادا ءوتىپ جاتقان كورمەگە قازاقستاندا اەس سالۋدان ءۇمىتتى ءتورت ۆەندور شاقىرتىلدى، ياعني فرانسيا، قىتاي، رەسەي جانە وڭتۇستىك كورەيا كومپانيالارى بار.

«بۇل ۆەندورلاردىڭ بارلىعى ا ە س قۇرىلىسىندا وزدەرىن جاقسى جاعىنان تانىتا الدى. بۇگىنگى كورمە اياسىندا ەل حالقى قانداي تەحنولوگيالاردى قاراستىرىپ جاتقانىمىزدى ءوز كوزىمەن كورە الادى. وسىندا زاماناۋي رەاكتورلاردىڭ ۇلگىسى تانىستىرىلىپ وتىر»، - دەدى دەپارتامەنت باسشىسى.

ونىڭ سوزىنە قاراعاندا، ا ە س قۇرىلىسىنا 10 جىلدان استام ۋاقىت كەرەك.

«بىزدە ا ە س- ءتى باسقارا الاتىن كادرلىق الەۋەت تاپشى دەپ ايتۋعا بولمايدى. مينيسترلىككە قاراستى ەكى مىقتى ينستيتۋت بار - يادرولىق فيزيكا ينستيتۋتى جانە ۇلتتىق يادرولىق ورتالىعى. بۇدان بولەك، ەلىمىزدەگى باسقا دا جوعارى وقۋ ورىندارىن جىل سايىن جاس تاماندار ءتامامداپ جاتىر»، - دەدى ا. سەرعازين.

بۇدان بولەك ول اەس قۇرىلىسىندا كونسورتسيۋم ارقىلى ىسكە اسىرۋ تيىمدىلىگى پىسىقتالىپ جاتقانىن ايتتى.

«حالىقارالىق كونسورتسيۋمدى دا قاراستىرىپ وتىرمىز. وسى ورايدا بۇگىن قامتىعان ۇمىتكەر كومپانيالاردىڭ بارلىعىنىڭ قاتىسۋىن جوققا شىعارمايمىز»، - دەدى دەپارتامەنت باسشىسى Kazinform ءتىلشىسىنىڭ سۇراعىنا جاۋاپ بەرە وتىرىپ.

ايتا كەتەيىك، قازاقستاندا ا ە س سالۋ ماسەلەسىنە ارنالعان رەسپۋبليكالىق رەفەرەندۋم تۋرالى پرەزيدەنت جارلىعىنىڭ جوباسى ۇكىمەت قاراۋىنا جىبەرىلدى.