ونىڭ ايتۋىنشا، دەپۋتاتتارعا اۆتومەكتەپتەرگە قاتىستى تۇرعىنداردان شاعىمدار كوبەيگەن.
- قازىر جۇرگىزۋشى كۋالىگىن الۋ ءۇشىن ءاربىر ادام 2,5 اي اۆتومەكتەپ بازاسىنا تىركەلەدى، تولىق كۋرستان وتۋگە مىندەتتى. بۇل ءوز كەزەگىندە دۇرىس تالاپ. وسى ءۇشىن اركىم وقۋ اقىسىن تولەيدى. ءبىراق ودان بولەك اۆتومەكتەپتىڭ كىرەبەرىسىندە QR-كود تۇرادى جانە ول بويىنشا 8,5 مىڭ تەڭگە تولەۋگە مىندەتتىسىڭ. بۇل تولەم اۆتومەكتەپكە قاتىسى جوق. جىلىنا شامامەن 670 مىڭ ادام جۇرگىزۋشى كۋالىگىنە تاپسىرادى. ءارقايسى 8,5 مىڭ تەڭگەدەن تولەسە، جىلىنا 5,6 ميلليارد تەڭگە جينالادى. بۇل قوماقتى قاراجات كىمنىڭ قالتاسىنا كەتىپ جاتىر؟ وسى اقشا ۇكىمەتكە دە، ءى ءى م جۇيەسىنە دە تۇسپەيدى، ياعني اشىق ەسەپتە جوق. الدىن الا مالىمەت بويىنشا بۇل قاراجات شەتەلدە تۇراتىن جەكە ادامنىڭ قالتاسىنا ءتۇسىپ جاتىر. بۇل اشىق تۇردە قالىپتاسقان «كولەڭكەلى» قارجى اينالىمى جانە ىقتيمال لوببيستىك سحەما ەمەس پە؟ اۆتومەكتەپتەردى ءار ازاماتتان مىندەتتى تۇردە اقشا جيناۋعا كىم ماجبۇرلەپ وتىر؟ بۇل زاڭسىز قارجى اينالىمىن قاشان توقتاتاسىزدار؟ رەسمي تەكسەرىس قاشان باستالادى؟ - دەپ سۇرادى ءماجىلىس دەپۋتاتى ماقسات تولىقباي.
ءوز كەزەگىندە ىشكى ىستەر ءمينيسترىنىڭ ورىنباسارى سانجار ءادىلوۆ بۇل ماسەلە بۇعان دەيىن ماجىلىستەگى جۇمىس توبىنىڭ وتىرىسىندا كوتەرىلگەنىن ەسكە سالدى.
- قازىر اكىمشىلىك پوليتسيا كوميتەتى قىزمەتتىك تەكسەرىس باستالدى. سونىمەن قاتار، زاڭ جوباسى اياسىندا جۇمىس توبىنداعى تالقىلاۋ كەزىندە دۇرىس شەشىم قابىلدانعان ەدى. سوندىقتان اۆتومەكتەپتەر مەن اكىمشىلىك پوليتسيا اراسىندا ەشقانداي ءتۇرلى وداقتار مەن دەلدالدار بولماۋى كەرەك ەكەنى ناقتىلاندى. بۇل رەتتە سىبايلاس جەمقورىلىققا جول بەرىلمەۋى كەرەك. وسى تۇرعىدا شارا قابىلدايمىز، - دەدى ءمينيستردىڭ ورىنباسارى.
بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول قاۋىپسىزدىگىن سيفرلاندىرۋ جانە جۇرگىزۋشىلەردى دايارلاۋ سالاسىنداعى كاسىپكەرلىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.