بۇل - ادام ومىرىنە قاۋىپ توندىرەتىن اسا قاۋىپتى ارەكەت. ابىروي بولعاندا جاسوسپىرىمدەر زارداپ شەككەن جوق. وقيعانى بىلگەن بويدا پوليتسيا قىزمەتكەرلەرى دەرەۋ ءتيىستى شارالار قابىلداپ، بەينەجازبالاردى اۋماقتاعى مەكتەپتەردىڭ پوليتسيا ينسپەكتورلارىنا جولدادى. ناتيجەسىندە مەكتەپ ينسپەكتورى وزىنە بەكىتىلگەن مەكتەپتىڭ وقۋشىلارى ەكەنىن تانىدى. ولار قالا مەكتەپتەرىنىڭ بىرىندە ءبىلىم الاتىن 8-9-سىنىپ وقۋشىلارى بولىپ شىقتى. پوليتسيا قىزمەتكەرلەرى مەكتەپ اكىمشىلىگىمەن بىرلەسىپ، جاسوسپىرىمدەر مەن ولاردىڭ اتا-انالارىن مەكتەپكە شاقىرىپ، پروفيلاكتيكالىق ءتۇسىندىرۋ جۇمىستارىن جۇرگىزدى. وقۋشىلارعا مۇنداي ارەكەتتەردىڭ سالدارى اۋىر بولۋى مۇمكىن ەكەنىن ءتۇسىندىرىپ، جول قوزعالىسى قاۋىپسىزدىگى تالاپتارىن ساقتاۋ قاجەتتىگىن قاتاڭ ەسكەرتتى.
اتالعان جاعدايعا بايلانىستى كامەلەتكە تولماعانداردىڭ اتا-انالارى زاڭناماعا سايكەس اكىمشىلىك جاۋاپكەرشىلىككە تارتىلدى. وسى رەتتە پوليتسيا اتا-انالارعا بالالاردىڭ قاۋىپسىزدىگىنە ەرەكشە نازار اۋدارۋدى ەسكەرتەدى. ءجۇرىپ كەلە جاتقان اۆتوبۋسقا نەمەسە باسقا دا كولىك قۇرالدارىنا جابىسىپ ءجۇرۋ - وتە قاۋىپتى ارەكەت. كولىك كەنەتتەن توقتاعان نەمەسە بۇرىلعان جاعدايدا جاسوسپىرىمدەر جولعا قۇلاپ، اۋىر جاراقات الۋى نەمەسە قايعىلى جاعدايعا ۇشىراۋى مۇمكىن. ءبىر ساتتىك قىزىعۋشىلىقتىڭ سوڭى ورنى تولماس وكىنىشكە اينالماسىن!