اۆتوبۋس اپاتىندا 2 اياعىنان ايىرىلعان قىزدىڭ وتباسىنا باسپانا بەرىلەدى - جەڭىس قاسىمبەك

استانا. KAZINFORM - ەلوردادا اۆتوبۋستىڭ جول اپاتىنا ءتۇسۋى سالدارىنان ەكى اياعىنان ايىرىلعان قىزدىڭ وتباسىنا اكىمدىك تاراپىنان باسپانا بەرىلەدى. بۇل تۋرالى بۇگىن استانا قالاسىنىڭ اكىمى جەڭىس قاسىمبەك ايتتى.

- ول كىسىگە، قىزىنا، وتباسىنا بىرنەشە رەت مەنىڭ ارىپتەستەرىم، ونىڭ ىشىندە ورىنباسارىم باردى. كەشە بالالار ومبۋدسمەنى بارىپ قايتتى. بۇگىن دە تۇسكە تامان ورىنباسارىم سول كىسىلەرمەن بىرگە تاعى بارادى. كومەك جاعىنا كەلەر بولساق، ساقتاندىرۋى 20 ميلليون تەڭگە شاماسىندا جانە اكىمشىلىك 10 ميلليون تەڭگە بەردى. قوسىمشا 10 ميلليون تەڭگە بەرەمىز دەپ جوسپارلاپ وتىرمىز. سونىمەن قاتار باسپانا ماسەلەسىن شەشىپ بەرەمىز. ونى سىزدەرگە رەسمي تۇردە ايتىپ وتىرمىز. باسپانا ماسەلەسى شەشىلەدى، - دەدى قالا اكىمى اقوردادا ب ا ق وكىلدەرىنىڭ ساۋالىنا وراي.

بۇعان دەيىن حابارلاعانىمىزداي، 2-ماۋسىمدا استانادا اۆتوبۋس جۇرگىزۋشىسى رولگە يە بولا الماي، جول جيەگىندەگى باعانعا سوعىلدى. جەدەل مەديتسينالىق جاردەم بريگادالارى قالا ستاتسيونارلارىنا بارلىعى 15 ادامدى جەتكىزدى. ولاردىڭ ۇشەۋى اۋرۋحاناعا جاتقىزىلدى. جول اپاتى كەزىندە زارداپ شەككەن قىز بالانىڭ اياعىنا امپۋتاتسيا جاسالدى.

اۆتوبۋس جۇرگىزۋشىسى ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلىپ جاتىر.

اۆتور

مارلان جيەمباي