پاتەردى جالعا بەرۋشىلەر جەكە تابىس سالىعىنان بوساتىلادى
استانا. قازاقپارات- پاتەرىن جالعا بەرۋشى ازاماتتارعا جاقسى جاڭالىق! جاڭا سالىق كودەكسى كۇشىنە ەنسە، ولار جەكە تابىس سالىعىنان بوساتىلادى.
باسپاناسىن جالعا بەرۋدەن تۇسكەن تابىسى ايىنا 300 ايلىق ەسەپتىك كورسەتكىشتەن اسپاسا، ولارعا جەكە كاسىپكەر رەتىندە تىركەلمەۋگە دە رۇقسات. جاڭا كودەكستە بۇعان قاتىستى تاعى قانداي جاڭالىق بار؟
قازىر پاتەر جالداۋمەن اينالىساتىن ازاماتتار پاتەنت نەگىزىندە جۇمىس ىستەسە 1 پايىزدىق، وڭايلاتىلعان رەجيمگە كوشسە 3 پايىزدىق جەكە تابىس سالىعىن تولەيدى. ءبىراق جاڭا سالىق كودەكسى كۇشىنە ەنسە، كەلەر جىلدان باستاپ ولار تەك الەۋمەتتىك تولەمدەردى عانا اۋدارماق. سونداي-اق قازىرگىدەي جەكە كاسىپكەر رەتىندە تىركەلۋگە مىندەتتەلمەيدى، توقسان سايىن سالىق بويىنشا، ەسەپ بەرمەيدى جانە دەكلاراتسيا دا تاپسىرمايدى.
داۋرەن سانعىلبايەۆ، ق ر ق م م ك ك ارناۋلى سالىق رەجيمى اكىمشىلەندىرۋ باسقارماسىنىڭ باس ساراپشىسى:
- ەگەر كەز-كەلگەن جەكە تۇلعا ءوزىنىڭ پاتەرىن جالعا بەرەتىن بولسا، ءبىر ايداعى تابىسى 300 ا ە ك- تەن اسىپ كەتپەۋى ءتيىس. ەكىنشىدەن، تابىسىنا ەشقانداي جەكە تابىس سالىعى سالىنبايدى. كودەكستە كورسەتىلگەن 0 پايىزبەن وتەدى. تەك ءبىر عانا شارت بار - ول مىندەتتى الەۋمەتتىك تولەمدەردى تولەۋ. ياعني، زەينەتاقى جارنالارىن تولەۋ، جۇمىس بەرۋشىنىڭ جەكە جارنالارىن تولەۋ، الەۋمەتتىك تولەمدەر جانە مەديتسينالىق ساقتاندىرۋ تولەمدەرىن تولەيدى. بۇل شامامەن 4 پايىزدى قۇرايدى. ال اي سايىنعى تابىس 300 ايلىق ەسەپتىك كورسەتكىشتەن اسسا، بۇل دەگەنىمىز شامامەن 1 ميلليون 200 مىڭنان استام سومانى قۇرايدى. وندا كاسىپكەر رەتىندە تىركەلىپ، 4 پايىزدىق جەكە تابىس سالىعىن تولەۋى قاجەت جانە الەۋمەتتىك تولەمدەردى دە ەستەن شىعارماعان ءجون.
نۇرلان جاڭابايەۆ، زاڭگەر:
- سالىق كوميتەتىنىڭ ءتيىستى اقپاراتتا باعدارلامالارى بار. ولار ءبىزدىڭ ق ر بانكتارىمەن نەمەسە باسقا دا جۇيەلەرىمەن جۇمىس ىستەيدى. سولار بارلىعىن كورىپ وتىرادى. جەكە كاسىپكەر قانشا اقشا الدى، قانشا تولەدى، قانشا تولەۋى كەرەك دەگەن. قازىر وزدەرىڭىز بىلەسىزدەر بارلىعى ونلاين تۇردە.
ال كوممەرتسيالىق نىسانداردى جالعا بەرەتىن كاسىپكەرلەر قايتپەك؟ قولدانىستاعى زاڭناماعا سايكەس، جالپىعا بىردەي رەجيمدە جۇمىس ىستەيتىن ازاماتتار تابىسىنىڭ 10 پايىزىن، جاۋاپكەرشىلىگى شەكتەۋلى سەرىكتەستىكتەر 20 پايىزىن سالىققا اۋدارۋدا. ال جاڭا كودەكس كۇشىنە ەنسە، بۇل كورسەتكىش قالاي وزگەرمەك؟
نۇرلان جاڭابايەۆ، زاڭگەر:
- ولارعا 20-25 پايىزداي شىعىپ، قيىن بولىپ تۇر. دەمەك مامانداردىڭ سوزىنە سەنسەك، جالعا الۋ قۇنى دا قىمباتتاۋى ىقتيمال. ءبىراق، ەكىنشى جاعىنان كولەڭكەلى ەكونوميكانىڭ تومەندەۋىنە تۇرتكى بولۋى دا عاجاپ ەمەس. ايتا كەتكەن ءجون، سالىق تولەمىنەن جالتارعان ازاماتتارعا مەملەكەتتىك كىرىستەر كوميتەتى تاراپىنان الدىمەن ەسكەرتۋ بەرىلەدى. كەيىن 15-تەن 30 ايلىق كورسەتكىشكە دەيىن ايىپپۇل سالىنادى.
24.kz