پاتەر، نوۋتبۋك، ايفون: ۇ ب ت-دان 140 بال جيناعان تۇركىستاندىق تۇلەككە قانداي سىيلىقتار بەرىلدى
تۇركىستان. KAZINFORM - جانىبەك ءابىلحانعا قوسىمشا ءبىلىم بەرۋ ورتالىعىنىڭ باسشىلىعى پاتەردىڭ سەرتيفيكاتىن تابىس ەتتى.
بۇعان دەيىن اتالعان ءبىلىم بەرۋ ورتالىعى الەۋمەتتىك جەلىلەردە 140 بال جيناعان تۇلەككە سىي رەتىندە پاتەر بەرىلەتىندىگىن مالىمدەگەن بولاتىن. ال، سول ورتالىقتا ءبىلىم العان جانىبەك ءابىلحان ۇ ب ت-دان 140 ۇپاي الدى. ورتالىق باسشىلىعى دا ۋادەسىندە تۇردى. بۇگىن پاتەردىڭ سەرتيفيكاتى سالتاناتتى تۇردە جانىبەك پەن ونىڭ اناسىنا تابىستالدى.
- تۇرعىن ءۇيدى راسىمدەۋ جانىبەك وقۋعا تۇسەتىن قالاعا بايلانىستى جۇزەگە اسادى. ەگەر ول استانانى تاڭداسا، پاتەر ەلوردادان بەرىلەدى، ال الماتىنى تاڭداسا - پاتەر سول جاقتان بەرىلەدى، - دەپ اتاپ ءوتتى ءبىلىم بەرۋ ورتالىعىنىڭ وكىلدەرى.
سونىمەن قاتار، ۇ ب ت-داعى جوعارى ناتيجەسى ءۇشىن جانىبەك ءبىلىم سالاسى وكىلدەرىنەن باعالى سىيلىقتار الدى. مەكتەپ ديرەكتورى تۇلەككە iPhone سمارتفونىن، اۋداندىق ءبىلىم ءبولىمىنىڭ باسشىسى نوۋتبۋك، ال اۋدان اكىمى تەلەديدار سىيعا تارتتى.
ايتا كەتەيىك، جانىبەك ۇ ب ت-نى «ماتەماتيكا - ينفورماتيكا» پاندەر كومبيناتسياسى بويىنشا تاپسىرعان. ول اۋىلدىق مەكتەپ-گيمنازيانى اياقتاپ، الماتىدا اقپاراتتىق تەحنولوگيالار سالاسى بويىنشا ءبىلىمىن جالعاستىرۋدى جوسپارلاپ وتىر.
ەسكە سالا كەتەيىك، بۇدان بۇرىن ورداباسى اۋدانىنىڭ تۇرعىنى، شوقان ءۋاليحانوۆ اتىنداعى مەكتەپ-گيمنازيا تۇلەگى ءابىلحان جانىبەك ۇلتتىق ءبىرىڭعاي تەستىلەۋدەن ەڭ جوعارى ناتيجە - 140 ۇپاي جيناعانىن جازعان بولاتىنبىز.
اۆتور
قايرات زاينيشيەۆ