اتلانت مۇحيتىنداعى رەكوردتىق داۋىل ماۋسىمى اياقتالۋدا

استانا. KAZINFORM - دۇنيەجۇزىلىك مەتەورولوگيالىق ۇيىم (د م ۇ) اتلانتيكالىق داۋىل ماۋسىمى وسى دەمالىس كۇندەرى رەسمي تۇردە اياقتالىپ، امەريكا مەن كاريب تەڭىزىندە قيراۋ، ەكونوميكالىق شىعىن ءىزىن قالدىراتىنىن مالىمدەدى، دەپ حابارلايدى Kazinform ءتىلشىسى ب  ۇ ۇ باسپا ءسوز قىزمەتىنە سىلتەمە جاساپ.

بيىلعى جىلى 18 اتاۋلى داۋىل، 11 داۋىل جانە 3 نەمەسە ودان جوعارى ساناتتاعى بەس ءىرى داۋىل بولعان. بۇل اتلانت باسسەينى ءۇشىن ورتاشادان جوعارى كورسەتكىش، مۇنداي بەلسەندىلىك قاتارىنان توعىزىنشى ماۋسىم بويى قايتالانۋدا.

- جىلدان جىلعا كليماتتىق داعدارىس جاڭا رەكوردتار جاساۋدى جالعاستىرۋدا. بۇل ەكسترەمالدى اۋا رايى وقيعالارىنىڭ، سونىڭ ىشىندە تروپيكالىق تسيكلونداردىڭ تەز كۇشەيۋىنە، قارقىندى جاۋىن- شاشىن مەن سۋ تاسقىنىنا الىپ كەلەدى، - دەدى دمۇ باس حاتشىسى سەلەستا ساۋلو.

بەريلل داۋىلى اتلانت مۇحيتىنىڭ باسسەينىندە تىركەلگەن ەڭ العاشقى 5-ساناتتاعى داۋىل رەتىندە تاريحقا ەندى. شىلدەدە ول كاريب تەڭىزىندە جويقىن كۇشپەن سوقتى. بەريلل ۇيلەر مەن ينفراقۇرىلىمعا ايتارلىقتاي زيان كەلتىرگەنىمەن، ونىڭ ادام ومىرىنە تونەتىن قاۋپى ەرتە ەسكەرتۋ جۇيەلەرى ارقىلى ءبىراز ازايتىلدى.

اتموسفەرالىق جاعدايلارعا بايلانىستى تامىزدا داۋىلدىڭ بەلسەندىلىگى باسەڭدەدى، ءبىراق قىركۇيەكتىڭ باسىندا داۋىلداردىڭ جيىلىگى مەن قارقىندىلىعى قايتادان ارتتى. 25 -قىركۇيەكتەن بەرى جەتى داۋىل بولدى، بۇل ماۋسىمنىڭ سوڭعى رەكوردى.

«حەلەن» داۋىلى فلوريدانىڭ شىعاناعى جاعالاۋىنا قىركۇيەكتىڭ اياعىندا سوعىپ، اپاتتى سۋ تاسقىنى مەن شىعىن اكەلدى. بۇل داۋىل امەريكا قۇراما شتاتتارىندا 2005 -جىلى كاترينا داۋىلىنان كەيىنگى ەڭ ءقاۋىپتىسى بولدى.

2024 -جىلعى داۋىل ماۋسىمى كليماتتىق داعدارىستان تۋىنداعان كۇشتى داۋىلداردىڭ الاڭداتارلىق ءۇردىسىن كورسەتتى.

تروپيكالىق تسيكلونداردان قازا بولعانداردىڭ ورتاشا سانى 1970-  جىلدارداعى 350 مىڭنان استام ادامنان 2010 -جىلدارداعى 20 مىڭعا دەيىن تومەندەگەنىمەن، ەكونوميكالىق شىعىندار ءوستى. تەك 2024 -جىلى قۇراما شتاتتارداعى ءتورت داۋىلدىڭ ءارقايسىسى 1 ميلليارد دوللاردان استام شىعىن اكەلدى.