اتاۋلى الەۋمەتتىك كومەكتى تاعايىنداۋ ءتارتىبى وزگەرەدى

استانا. KAZINFORM - قازاقستاندىقتار ەندى اتاۋلى الەۋمەتتىك كومەكتى جاڭا تارتىپپەن الادى. قۇجات جوباسى «اشىق ن ق ا» پورتالىندا جاريالاندى.

ەڭبەك جانە حالىقتى الەۋمەتتىك قورعاۋ مينيسترلىگى بيىل اقپاندا مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن كومەككە مۇقتاج جانداردىڭ جيىنتىق كىرىسى مەن شىعىسىن ايقىنداۋدى ەسكەرە وتىرىپ، حالىققا الەۋمەتتىك كومەك كورسەتۋ تەتىگىن جەتىلدىرۋ جونىندە شارالار قابىلداۋعا قاتىستى تاپسىرماسىن ورىنداۋ ماقساتىندا اتاۋلى الەۋمەتتىك كومەكتى تاعايىنداۋ قاعيدالارىنا وزگەرىستەر ەنگىزىپ وتىر.

جاڭا بۇيرىق جوباسىنا سايكەس اتاۋلى الەۋمەتتىك كومەكتى الۋعا ءۇمىتتى ازامات مەملەكەتكە شىعىس وپەراتسيالارىن، ياعني بانك شوتى، بانك الدىنداعى قارىزى، ميكروكرەديتى (بولعان جاعدايدا)، جيناق سالىمى مەن دەپوزيتتەگى قاراجاتىنىڭ قوزعالىسى تۋرالى مالىمەتتەردى ۇسىنۋى ءتيىس.

- ماقسات - كومەككە ناقتى مۇقتاج ازاماتتارعا جيىنتىق كىرىسى مەن شىعىسىن ايقىنداپ، الەۋمەتتىك قولداۋ كورسەتۋ. اتاۋلى الەۋمەتتىك كومەك تاعايىنداۋ تەتىگىندەگى وزگەرىستەر كومەككە شىن مانىندە مۇقتاج ازاماتتاردى انىقتاۋعا جانە ولارعا مەملەكەت تاراپىنان نىسانالى قولداۋدى قامتاماسىز ەتۋگە مۇمكىندىك بەرەدى، - دەلىنگەن قۇجات ماتىنىندە.

سونداي-اق، ۆەدومستۆو اتاۋلى الەۋمەتتىك كومەكتى جاڭا تارتىپپەن تاعايىنداۋ مەملەكەتتىك قولداۋدىڭ اشىقتىعىن كۇشەيتۋگە ىقپال ەتەتىنىن العا تارتىپ وتىر. قۇجات جوباسى بيىل 5-مامىرعا دەيىن قوعامدىق تالقىلاۋعا ۇسىنىلىپ وتىر، جاڭا ءتارتىپ قابىلدانعان جاعدايدا بيىل جەلتوقساندا ىسكە قوسىلادى.

ەسكە سالايىق، اتاۋلى الەۋمەتتىك كومەك الاتىن قازاقستاندىقتاردىڭ تابىسى مەن شىعىسى ەسەپكە الۋ ماسەلەسى بىلتىر قوزعالعان ەدى.

سونداي-اق بىلتىر جىل سوڭىندا اتاۋلى الەۋمەتتىك كومەكتى كوپ الاتىن وڭىرلەردى انىقتاعان ەدىك.