بۇل تۋرالى Kazinform اگەنتتىگىنىڭ قىتايداعى مەنشىكتى ءتىلشىسى حابارلادى.
رەسپۋبليكا كۇنىنە وراي ۇيىمداستىرىلعان ءىس-شارا قىزىلوردا وبلىسى اكىمدىگىنىڭ قولداۋىمەن ءوتتى. كونسەرت قازاقستان مەن قىتاي اراسىنداعى گۋمانيتارلىق ىنتىماقتاستىقتى نىعايتۋعا جانە ۇلتتىق ونەردى حالىقارالىق دەڭگەيدە دارىپتەۋگە ارنالدى.
كونسەرتتە ءوڭىردىڭ تانىمال ونەر مايتالماندارى ونەر كورسەتتى. ساحناعا قىزىلوردا وبلىستىق فيلارمونياسىنىڭ فولكلورلىق ءانسامبلى، «توميريس» بي ۇجىمى، «التىن دومبىرا» بايقاۋىنىڭ ءۇش دۇركىن جەڭىمپازى، اقىن-يمپروۆيزاتور مۇحتار نيازوۆ، «قۇرمەت» وردەنىنىڭ يەگەرلەرى شولپان بيمبەتوۆا، اقمارال نوگايبايەۆا، سامال بايسەيىتوۆا مەن ينديرا ەلۋبايەۆا شىقتى.
سونداي-اق «ەرەن ەڭبەگى ءۇشىن» مەدالىنىڭ يەگەرلەرى رۋسلان احمەتوۆ پەن سىمبات تاسبەرگەنوۆا، «مادەنيەت سالاسىنىڭ ۇزدىگى» توسبەلگىسىنىڭ يەگەرلەرى راۋزا ىسقاقوۆا، گۇلفيرا ءاليحانوۆا مەن ماقسات ماقۇلبەكوۆ، حالىقارالىق جانە رەسپۋبليكالىق بايقاۋلاردىڭ لاۋرەاتتارى ماعجان امانجولوۆ، بەكزات مولدابەرگەنوۆ پەن ارايلىم ماحانبەتجانوۆا ونەر كورسەتتى.
كەش بارىسىندا ونەرپازدار كورەرمەندەرگە قازاقتىڭ ءداستۇرلى كۇيلەرىن، حالىق اندەرىن جانە حورەوگرافيالىق ونەردىڭ جارقىن ۇلگىلەرىن ۇسىندى. ولار قازاقستاننىڭ باي رۋحاني مۇراسى مەن ورىنداۋشىلىق ونەرىنىڭ جوعارى دەڭگەيىن تانىتتى.
مازمۇندى كونسەرتتىك باعدارلامانىڭ قويۋشى رەجيسسەرى - مادەنيەت سالاسىنىڭ ۇزدىگى ءازيزا ءىزدىقۇلوۆا. ول ۇلتتىق داستۇرلەر مەن زاماناۋي ساحنا مۇمكىندىكتەرىن ءبىرتۇتاس قويىلىمعا بىرىكتىردى.
قازاقستاندىق ونەرپازداردىڭ ونەرىن كورەرمەندەر دۋ قول شاپالاقپەن قارسى الدى. كونسەرت سوڭىندا ولار باعدارلامانىڭ جوعارى دەڭگەيىنە ءتانتى بولعانىن جاسىرمادى.
- ءبىز شىڭجاڭنان بالامىزدى ەمدەتۋ ءۇشىن بەيجىڭگە كەلدىك. وسى مۇمكىندىكتى پايدالانىپ، بەيجىڭدەگى قازاقستاننىڭ مادەني ورتالىعىنا دا بارۋدى ۇيعاردىق. قىزىلوردالىق ونەرپازداردىڭ كونتسەرتىنە تاپ بولعانىمىزعا وتە قۋانىشتىمىز. ولاردىڭ ونەرىنە ءتانتى بولدىق! وسىنداي مادەني الماسۋ كەڭەيىپ، قازاقستاندىق ۇجىمدار بىزگە ءجيى كەلسە ەكەن دەيمىز. كونسەرت وتە جوعارى دەڭگەيدە ۇيىمداستىرىلعان، - دەدى ق ح ر شىڭجاڭ-ۇيعىر اۆتونوميالىق اۋدانىنىڭ التاي قالاسىنان كەلگەن مۇعالىم مايرا باقاس قىزى.
جەرگىلىكتى قازاق دياسپوراسىنىڭ وكىلى ايشولپان دا كونسەرتتەن ەرەكشە اسەر العانىن ايتتى.
- كوڭىلىم ەرەكشە جىلىپ قالدى. بەيجىڭدە ءجۇرىپ، ۇلتتىق اندەرىمىز بەن بيلەرىمىزدى تاماشالاۋ مۇمكىندىگىنە يە بولعانىما وتە قۋانىشتىمىن. اسىرەسە، كونسەرتتىڭ سوڭىندا ورىندالعان «اتامەكەن» ءانى جۇرەگىمدى ەرەكشە تەبىرەنتتى، - دەدى ول.
مەرەكەلىك كەشكە شەتەلدىكتەر اراسىندا قازاق ءتىلىن ءبىلۋ دەڭگەيى بويىنشا وتكەن III حالىقارالىق بايقاۋعا قاتىسقان ليۋ سياولان دا كەلدى. ول قازاق ءتىلىن 62 جاسىندا ءوز بەتىنشە ۇيرەنە باستاعان.
- بۇگىنگى كونسەرت ماعان ەرەكشە اسەر قالدىردى. بۇل ۇلتتىق داستۇرلەردىڭ بايلىعىن ايقىن تانىتقان، كاسىبي دەڭگەيى جوعارى ۇجىمنىڭ ناعىز سالتاناتتى كونسەرتى بولدى. كۇتكەنىمنەن دە اسىپ ءتۇستى. ماعان ءبارى ۇنادى: ءداستۇرلى كيىمدەردىڭ اسەمدىگى مەن الۋان تۇرلىلىگى، مۋزىكالىق اسپاپتار جانە، ارينە، ورىنداۋشىلىق شەبەرلىك. اسىرەسە، ۆوكالدىق ونەردى اتاپ وتكىم كەلەدى. مەنىڭشە، بۇل - سىزدەردىڭ ەڭ مىقتى قىرلارىڭىزدىڭ ءبىرى، وعان ءاردايىم ءتانتىمىن. بۇگىن وسىنىڭ ءبارىن جاندى داۋىستا تىڭداپ، ەرەكشە ءلاززات الدىم. كوپ راقمەت! - دەدى ليۋ سياولان.
كونسەرت 2026-جىل قازاقستان مەن قىتايدىڭ مادەنيەت جىلى دەپ جاريالانۋىنا وراي ۇيىمداستىرىلعان ماڭىزدى العاشقى ءىس-شارالاردىڭ ءبىرى بولدى. كەشكە قىتاي استاناسىنىڭ تۇرعىندارى مەن قوناقتارى، سونداي-اق ەكى ەلدىڭ مادەنيەت جانە ونەر قايراتكەرلەرى قاتىستى.