اتاجۇرتقا التايدان كوشىپ كەلدىم: وسكەمەندىك ازاماتتىڭ ءوز ۇيىندە جاساعان سابىنىنا سۇرانىس ارتىپ كەلەدى
وسكەمەن. KAZINFORM - وسكەمەن قالاسىنىڭ ىرگەسىندەگى شىعىس اۋىلىندا تۇراتىن جىگەر بورانباي كىر سابىن جاساپ، سونى ساۋدالاپ پايدا تاۋىپ ءجۇر. الىپ-ساتارلىقپەن اينالىسپاي ءوزى تاۋار شىعاراتىن ازامات الداعى ۋاقىتتا كاسىبىن كەڭەيتۋدى كوزدەيدى.
Kazinform ءتىلشىسى ونى اڭگىمەگە تارتىپ، سابىندى قالاي جاسايتىنىن سۇراپ كوردى.
- اڭگىمەمىزدى تۋىپ-وسكەن جەرىڭىزدەن باستاساق؟
- قىتاي حالىق رەسپۋبليكاسىنىڭ قابا اۋدانىندا تۋدىم. اتاجۇرتقا وتكەن جىلدىڭ تامىز ايىندا ايەلىم، ۇلىم، كەلىنىم مەن نەمەرەلەرىم كوشىپ كەلدىك. سول ۋاقىتتان بەرى وسكەمەندەگى شىعىس اۋىلىندا تۇرىپ جاتىرمىز.
- سابىن جاساۋ يدەياسى قالاي كەلدى؟
- بۇل يدەيانى جەرگىلىكتى ازامات سەرىكبەك رايحاننىڭ كەڭەسىمەن ىسكە اسىردىم. 2 ميلليون تەڭگەگە الماتىدان ستانوك الدىردىم. ونىڭ ءوزى بىرنەشە سايماننان، اۋىر تەمىردەن تۇرادى. العاشىندا قيىنداۋ بولدى. سابىن ۇگىتىلىپ، ويداعىداي شىقپادى. سوندا دا تاۋىمدى شاقپاي، ساعىمدى سىندىرماي ىستەي بەردىم. ۋاقىت وتە كەلە ۇيرەنىپ كەتتىك.
- كۇنىنە قانشا سابىن جاسايسىز؟
- بارلىعى ءۇش ادام - ۇلىم ەسحات جىگەر مەن كۇيەۋبالام ايدىن قاسيلانمەن بىرگە جۇمىس ىستەيمىز. كۇنىنە 1000 سابىن شىعادى. شاعىن كونتەينەر ساتىپ الىپ، ءۇي اۋلاسىنا ورناتقانمىن. سونىڭ ىشىندە جاسايمىز. ءىشىن جىلى ەتىپ قاپتاپ، توق پەش قويدىم. باستىسى، سۋ وتپەيدى. جۇمىستى تاڭەرتەڭ باستايمىز. كىر سابىن - توڭ ماي، سۇيىق ماي جانە كاۋستيك سوداسىنان دايىندالادى. توڭ مايدى قايناتىپ، ستانوكقا قۇيامىز. بارلىعى ناقتى گرادۋسپەن ولشەنەدى. كىر سابىن قالپىنا ءتۇسىپ، ستانوك ەكپىن العاندا ءۇش جاقتاپ جيناپ الامىز.
- سابىندى قانشا تەڭگەدەن ساتاسىز؟
- ءبىر سابىننىڭ باعاسى - 110 تەڭگە. ەگەر كۇن سايىن مىڭ سابىن شىعىپ، ويداعىداي ساتىلىپ جاتسا 110 مىڭ تەڭگە تۇسەدى. ونىڭ 50 مىڭى شىعىن. سوندا قالعان 60 مىڭى تازا تابىس.
- سابىننىڭ ساپالى ەكەنىن قالاي بىلۋگە بولادى؟
- كىر سابىنداردىڭ تۇسىندە وزگەشەلىك بولادى. سوعان قاراپ، ساپاسىن انىقتايدى. نەعۇرلىم قويۋ قوڭىر ءتۇستىسى كيىم، كىلەم جۋعاندا مولىنان كوپىرشيدى، كىردى تەز كەتىرەدى. ءدارى كوپ قوسىلىپ كەتسە، اشىق ءتۇس بەرەدى.
- ساۋداڭىز قالاي ءجۇرىپ جاتىر؟
- سۇرانىس كەيدە كۇرت كوبەيەدى، كەيدە ازايىپ قالادى. بىرنەشە اي بۇرىن قاراعاندىعا سابىن جونەلتتىك. ەندى جازدا قالاداعى بازارلارعا اپارىپ، تۇراقتى كليەنتتەر تابۋدى كوزدەپ وتىرمىز. قالاعاندار ۇيدەن ساتىپ الىپ كەتە الادى. اي سايىن الاتىندار از دا بولسىن كوبەيىپ كەلە جاتىر.
- الداعى جوسپارلارىڭىز قانداي؟
- كەلەشەكتە سەرتيفيكات راسىمدەپ، وزىندىك برەند قالىپتاستىرعىم كەلەدى. اتاۋى ازىرگە بەلگىسىز. ءبىراق جەر-سۋمەن بايلانىستىرىپ قويامىن با دەپ وتىرمىن. مۇنىڭ الدىندا «جۇپار» دەگەن ماركا تاڭداعىمىز كەلگەن. ءبىراق بىرەۋدىكىن الىپ قويا سالساق، ەرتەڭ وزىمىزگە سىن، ءارى اۆتورلىق قۇقىقتى بۇزعان بولىپ شىعامىز. ايتپەسە، ادەمى ەستىلەدى. كورەرمىز، بالكىم يىسكە قاتىستى اتاۋدى دا تاڭداۋىمىز مۇمكىن.
- اڭگىمەڭىزگە كوپ راحمەت!
اۆتور
تالعاتجان مۇحامەتبەك ۇلى