اپتاپ ىستىققا بايلانىستى ۇلكەن تاسجولداردا پوليتسيا كۇشەيتىلگەن رەجيمدە قىزمەت ەتۋدە

استانا. KAZINFORM - اقمولا وبلىسىندا پوليتسيا قىزمەتكەرلەرى اپتاپ ىستىقتا جولعا شىققان جۇرگىزۋشىلەرگە سۋ ۇسىنىپ، جول قاۋىپسىزدىگىنە مۇقيات بولۋعا شاقىرۋدا. بۇل تۋرالى قازاقپارات Polisia.kz سايتى حابارلادى.

اۋا رايىنىڭ كۇرت ىسۋىنا بايلانىستى اقمولا وبلىستىق پاترۋلدىك پوليتسيا روتاسىنىڭ قىزمەتكەرلەرى رەسپۋبليكالىق ماڭىزى بار ءۇش باعىتتا - استانا- قاراعاندى، استانا- پاۆلودار جانە استانا- قابانباي باتىر- تەمىرتاۋ اۆتوجولدارىندا ارنايى پروفيلاكتيكالىق ءىس-شارا وتكىزىپ جاتىر.

- كولىك جۇرگىزىپ كەلە جاتىپ شارشاۋ نەمەسە ۇيقى قىسۋ سەزىلسە، جول شەتىنە توقتاپ، تىنىعىپ العان ءجون. جۇرگىزۋشى مەن جولاۋشىلاردىڭ ءومىرى - باستى قۇندىلىق. كۇننىڭ قاتتى ىسۋىنا بايلانىستى ءبىز بەتى-قولدى جۋۋعا نەمەسە سالقىنداۋعا كومەكتەسۋ ءۇشىن سۋ ۇسىنىپ جاتىرمىز، - دەدى اقمولا وبلىسى پد پاترۋلدىك پوليتسيا روتاسىنىڭ 1-ۆزۆود كومانديرى ايبەك تولەۋبايەۆ.

پوليتسيا قىزمەتكەرلەرى الىس ساپارعا شىعار الدىندا كولىك قۇرالدارىنىڭ تەحنيكالىق جاي-كۇيىن مۇقيات تەكسەرۋگە جانە جولدا ءتارتىپ ەرەجەلەرىن قاتاڭ ساقتاۋعا كەڭەس بەرەدى. سونداي-اق ولار ازاماتتاردى ءوز دەنساۋلىعىنا دا جاۋاپكەرشىلىكپەن قاراۋعا شاقىرادى.

- قۇرمەتتى جۇرگىزۋشىلەر، سىزدەردى ۇيدە وتباسىڭىز كۇتىپ وتىر. سوندىقتان جولدا اسىقپاي، دەمالىپ وتىرىڭىزدار. پوليتسيا ءارقاشان سىزدەرمەن بىرگە، - دەپ اتاپ ءوتتى ۆزۆود كومانديرى.

ءتارتىپ ساقشىلارىنىڭ ايتۋىنشا، مۇنداي الدىن الۋ شارالارى، اسىرەسە اپتاپ ىستىق كۇندەرى ماڭىزدى. پوليتسيا تۇرعىنداردى جولدا اباي بولۋعا جانە جاقىندارىن قاۋىپتەن ساقتاندىرۋعا ۇندەيدى.