اپتاپ، جاڭبىر جانە جەل: قازاقستاندا الداعى كۇندەرى اۋا رايى قانداي بولادى؟

استانا. KAZINFORM - «قازگيدرومەت» سينوپتيكتەرى 19، 20 جانە 21-شىلدەگە ارنالعان اۋا رايى بولجامىن ۇسىندى.

قاي وڭىرلەردە جاڭبىر كۇتىلەدى؟

اپتانىڭ باسىندا اتموسفەرالىق فرونتال بولىكتەردىڭ وتۋىنە بايلانىستى قازاقستاننىڭ باسىم بولىگىندە جاڭبىر جاۋىپ، نايزاعاي وينايدى. 19-شىلدەدە - سولتۇستىكتە جانە ورتالىقتا، ال 20-شىلدەدە - ەلدىڭ شىعىسىندا قاتتى جاڭبىر، بۇرشاق جانە داۋىل كۇتىلەدى.

انتيتسيكلون كەلەدى

اپتانىڭ سوڭىنا قاراي ەل اۋماعىنا سولتۇستىك-باتىستان انتيتسيكلون كەلەدى. سونىڭ اسەرىنەن جاۋىن-شاشىن بىرتىندەپ توقتاپ، اۋا تەمپەراتۋراسى تومەندەيدى. رەسپۋبليكانىڭ كوپ بولىگىندە جەل كۇشەيەدى، ال وڭتۇستىكتە جانە وڭتۇستىك- باتىستا قۇمدى داۋىل سوعۋى مۇمكىن. تۇنگى جانە تاڭعى ۋاقىتتا سولتۇستىك-باتىس پەن سولتۇستىكتە تۇمان كۇتىلەدى.

اپتاپ ساقتالادى

باتىس جانە وڭتۇستىك-باتىس ايماقتاردا الداعى كۇندەرى قاتتى ىستىق ساقتالادى - اۋا تەمپەراتۋراسى 43 گرادۋسقا دەيىن جەتەدى. سولتۇستىك-باتىس پەن شىعىستا - 40 گرادۋس، ال وڭتۇستىك-شىعىستا - 42 گرادۋسقا دەيىن كوتەرىلەدى.