اتا-بابامىزدىڭ قۇقىقتىق مۇرالارىن مۇقيات زەردەلەپ، جان-جاقتى ناسيحاتتاۋىمىز كەرەك - پرەزيدەنت
استانا. KAZINFORM - مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە ادىلەتتى ءارى قاۋىپسىز قازاقستاندى قۇرۋ ءۇشىن زاڭ مەن ءتارتىپ ۇستەمدىگىن تۇبەگەيلى ورنىقتىرۋ كەرەك ەكەنىن ايتتى. بۇل تۋرالى اقوردانىڭ باسپا ءسوز قىزمەتى حابارلادى.
- ادىلەتتى ءارى قاۋىپسىز قازاقستاندى قۇرۋ ءۇشىن زاڭ مەن ءتارتىپ ۇستەمدىگىن تۇبەگەيلى ورنىقتىرۋ كەرەك. بۇل - بارشا ازاماتتىڭ مۇددەسىن، قۇقىعى مەن بوستاندىعىن قورعاۋدىڭ مىزعىماس تىرەگى. قوعامنىڭ قۇقىقتىق مادەنيەتىن ارتتىرىپ، قۇقىق قورعاۋ جۇيەسىن جەتىلدىرۋ قاجەت. بۇل - اۋقىمى كەڭ ماڭىزدى مىندەت، - دەدى مەملەكەت باسشىسى.
پرەزيدەنت قازاق حالقى قاي زاماندا دا زاڭعا باس يگەن، دالا زاڭىن ساقتاعان حالىق ەكەنىن اتاپ ءوتىپ، جۇمىستىڭ نەگىزگى باسىمدىقتارىنا توقتالدى.
- ەندى وسى جۇمىستىڭ نەگىزگى باسىمدىقتارىنا توقتالايىن. بىرىنشىدەن. ءبىز «زاڭ جانە ءتارتىپ» قاعيداتىن جاپپاي دارىپتەۋىمىز كەرەك. قازاق حالقى قاي زاماندا دا زاڭعا باس يگەن، دالا زاڭىن ساقتاعان حالىق. بۇل - ءبىزدىڭ قانىمىزعا سىڭگەن قاسيەت. تۇرىك قاعاناتى، التىن وردا مەن قازاق حاندىعى مىقتى مەملەكەتتىك قۇرىلىمى، بىرەگەي قۇقىقتىق جۇيەسى بار قۋاتتى ەل بولعانى بارىمىزگە ايان. قاسىم حاننىڭ قاسقا جولىن، ەسىم حاننىڭ ەسكى جولىن، ءاز تاۋكەنىڭ جەتى جارعىسىن ۇلى دالانىڭ كونستيتۋتسياسى دەۋگە بولادى. اتادان بالاعا جالعاسقان بۇل زاڭدار مەملەكەتتىلىك ءداستۇرىن نىعايتا وتىرىپ، قوعامدىق دامۋعا ەرەكشە ىقپال ەتكەن. ۇلى دالادا ەركىندىك پەن ادىلدىك، ار- نامىس پەن ادامگەرشىلىك، تىلەۋلەستىك پەن جاۋاپكەرشىلىك بارىنەن بيىك تۇرعان. سوندىقتان «زاڭ جانە ءتارتىپ» قاعيداتى ۇلتىمىزدىڭ رۋحى مەن دۇنيەتانىمىنا تولىق ساي كەلەدى. ءبىز اتا-بابامىزدىڭ بىرەگەي قۇقىقتىق مۇرالارىن مۇقيات زەردەلەپ، جان-جاقتى ناسيحاتتاۋىمىز كەرەك. بۇل - حالقىمىزدىڭ قۇقىقتىق سانا-سەزىمىن ارتتىراتىن ماڭىزدى فاكتوردىڭ ءبىرى، - دەدى پرەزيدەنت.
ايتا كەتەيىك، مەملەكەت باسشىسى قاسىم-جومارت توقايەۆ قۇقىق قورعاۋ ورگاندارىنىڭ كەڭەيتىلگەن القا ماجىلىسىندە سىبايلاس جەمقورلىقپەن كۇرەس ماسەلەسىن قوزعادى.