اسىراندى 6 بالانى ازاپتاعان «ەمشى» شىمكەنتتەگى تەرگەۋ يزولياتورىندا وتىر

شىمكەنت. KAZINFORM - اتىشۋلى قىلمىستىق ءىس بويىنشا شىققان قاۋلى نەگىزىندە «قامقورلىعىنا جانە اسىراپ العان بالالارىنا قورلىق كورسەتتى» دەپ ايىپتالعان ۇ. سمانوۆ جاۋاپكەرشىلىكتەن بوساتىلعان بولاتىن.

سوزىلمالى جانە پسيحيكالىق اۋرۋمەن اۋىراتىنى جانە ءوز ءىس- ارەكەتتەرىن جاساۋ كەزىندە ەس- ءتۇسسىز جاعدايدا بولعانىنا بايلانىستى مامانداندىرىلعان ۇلگىدەگى پسيحياتريالىق ستاتسيوناردا ماجبۇرلەپ ەمدەۋ شاراسى تاعايىندالعان. الايدا، ونىڭ قازىر تەرگەۋ يزولياتورىندا وتىرعانى بەلگىلى بولدى.

ۇلىقبەك سمانوۆ ق ر ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ شىمكەنت قالاسىنداعى №69 رەسپۋبليكالىق مەملەكەتتىك مەكەمەسىندە قاماۋدا وتىر. شىمكەنت قالالىق ق ا ج د رەداكسيامىزدىڭ ساۋالىنا جاۋاپ رەتىندە سمانوۆتىڭ تەرگەۋ يزولياتورىندا وتىرعانى تۋرالى اقپاراتتى قۇرعاق راستاۋمەن شەكتەلدى.

«جازاسىن وتەۋشى سوت تاعايىنداعان جازاسىن وتەپ جاتىر. ونىڭ دەنساۋلىعى تۋرالى اقپارات جاريا ەتىلەتىن اقپاراتقا جاتپايدى. سونىمەن بىرگە، سوتتالعاندارعا مەديتسينالىق كومەك كورسەتۋ دەنساۋلىق ساقتاۋ مينيسترلىگىنىڭ قۇزىرىنا بەرىلگەنىن حابارلايمىز»، - دەلىنگەن دەپارتامەنت جاۋابىندا.

ال، دەنساۋلىق ساقتاۋ مينيسترلىگى سوت قاۋلىسىمەن ماجبۇرلەپ ەمدەۋگە جىبەرىلگەن ناۋقاستىڭ جاعدايى مەن ەمدەۋ حاتتاماسى تۋرالى اقپارات بەرۋدەن باس تارتتى. «دارىگەرلىك قۇپياعا» سىلتەمە جاسالعان جاۋاپتا قازاقستان كونستيتۋتسياسىنا سايكەس ءاربىر ازاماتتىڭ جەكە ومىرىنە، ونىڭ ىشىندە جەكە جانە وتباسى قۇپياسىنا قۇقىعى بار ەكەنى كورسەتىلگەن. ءتىپتى، اۋىر قىلمىس ءۇشىن سوتتالعان كەزدە دە زاڭ جەكە ومىرگە سىرتتان ورىنسىز ارالاسۋعا جول بەرمەيدى.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ 171-بابى مەن 173-بابىندا سوتتالعاندارعا بولەك انىقتاما بەرىلمەگەن. ولار پسيحيكالىق جانە مىنەز-قۇلىق بۇزىلىستارى (اۋرۋلارى) بار ادامدار بولىپ سانالادى»، - دەلىنگەن دەنساۋلىق ساقتاۋ مينيسترلىگىنىڭ جاۋابىندا.

نەلىكتەن ۇلىقبەك سمانوۆ بۇگىنگە دەيىن اقتاس اۋىلىندا ورنالاسقان، ەلىمىزدەگى جالعىز مەكەمە سانالاتىن، قارقىندى باقىلاۋداعى مامانداندىرىلعان رەسپۋبليكالىق پسيحياتريالىق اۋرۋحاناعا اۋىستىرىلماعان؟ بۇل سۇراعىمىزعا جاۋاپ بەرگەن زاڭگەر ەۆگەني ياۆورسكي ەسى دۇرىس ەمەس دەپ تانىلعان جازاسىن وتەۋشىلەر شىنىمەن دە ارنايى مەكەمەلەردە ەمدەلۋ كەرەك ەكەنىن اتاپ ءوتتى. الايدا، كەيبىر جاعدايلاردا، ماسەلەن ورىن جەتكىلىكسىز بولعاندا نەمەسە اۋىستىرۋدى ۇيىمداستىرۋدا قيىندىقتار تۋىنداعان كەزدە ولار تەرگەۋ يزولياتورىندا قالۋى مۇمكىن.

«ونىڭ ەمدەلۋگە جىبەرىلگەنى تۋرالى اقپاراتتى ەسكەرسەك، وندا بۇل ۋاقىتشا شەشىم بولۋى مۇمكىن»، - دەپ ءتۇسىندىردى ادۆوكات.

قۇقىق قورعاۋشىنىڭ ويىنشا، ءىس جۇزىندە اقىل-ەسى دۇرىس ەمەس دەپ تانىلعان ادامداردىڭ قاجەتتى ەمدەۋ مەن ءتيىستى باقىلاۋدى قامتاماسىز ەتەتىن جاعدايدا بولۋىنا كەپىلدىك بەرەتىن شارالاردى ەنگىزۋ قاجەت.

ايتا كەتسەك، ق ر باس پروكۋراتۋراسى قۇقىقتىق ستاتيستيكا كوميتەتى «اقپاراتتىق قىزمەت» جۇيەسى جاساعان قۇجاتتا ۇ. سمانوۆتىڭ 1993 -جىلى «ابايسىزدا ادام ءولتىرۋ» بابىمەن ءىستى بولعانى جانە پسيحيكالىق اۋىتقۋىنا بايلانىستى قىلمىستىق ءىس توقتاتىلىپ، ول ماجبۇرلەپ ەمدەۋگە جىبەرىلگەنى كورسەتىلگەن.

ەسكە سالايىق، شىمكەنتتە جەرگىلىكتى «ەمشىنىڭ» 6 بالانى قامقورلىققا الىپ، ولارعا ءيت پەن مىسىقتىڭ ەتىن بەرگەنىن، مال باقتىرىپ، ءۇش جىلدان بەرى ازاپتاپ كەلگەنىن جازعان بولاتىنبىز. كەيىنىرەك ول تۋرالى تىڭ دەرەك شىقتى. وسى ىسكە بايلانىستى ءبىلىم سالاسىنىڭ ءبىرقاتار قىزمەتكەرى جازالاندى.

بالالاردىڭ ەلدىڭ بىرنەشە قالاسىنان اسىراپ الىنعانى بەلگىلى بولدى. اسىراپ الىنعان بالالاردىڭ اراسىندا ءۇش ايلىق ەگىز دە بار. بالالاردىڭ ءبىرىنىڭ اجەسى وسكەمەندە تۇرادى. Kazinform ءتىلشىسى 65 جاستاعى ناتاليا ۋستينوۆامەن جولىعىپ، جيەن نەمەرەسىنىڭ اسىراۋعا قالاي بەرىلگەنىن سۇراپ كوردى. ال شىمكەنتتەگى بالالار ءۇيىنىڭ باسشىسى قورلىق كورگەن وقۋشى تۋرالى ايتىپ بەردى.

قوعامدىق رەزونانس تۋعىزعان ءىس سوتقا ءتۇسىپ، ىسكە نۇكتە قويىلدى.

اۆتور

قايرات زاينيشيەۆ