اسىراۋعا بەرىلگەن 302 بالا كەرى قايتارىلعان
استانا. KAZINFORM - وقۋ-اعارتۋ ءمينيسترى عاني بەيسەمبايەۆ ءماجىلىس وتىرىسىنان كەيىن وتكەن باسپا ءسوز ءماسليحاتىندا اسىراپ العان بالالاردىڭ نەشە پايىزى كەرى قايتارىلاتىنىن ايتتى.
«مۇنداي ستاتيستيكا مىندەتتى تۇردە جۇرگىزىلىپ وتىرادى. 2020 -جىلى بالا اسىراپ العىسى كەلەتىن وتباسىلاردى دايىندايتىن مەكتەپ قۇرىلعانعا دەيىن اسىراپ الىنعان بالالاردىڭ 8-9 پايىزى كەرى قايتارىلاتىن. كەيىن ارنايى وقىتۋدىڭ ارقاسىندا بالانى قايتارىپ بەرۋ جاعدايلارى كۇرت كەمىگەنىن كورىپ وتىرمىز. دەي تۇرعانمەن ءالى دە قايتارىپ جاتقاندار بار. ءبىراق ولار بالا اسىراپ الۋعا دايىندايتىن وقۋدان وتپەگەن وتباسىلار ەكەنىن كورىپ وتىرمىز. سونداي-اق، تۋىستارىنان بالا اسىراپ العاندار كوبىنەسە قارتايۋىنا بايلانىستى جانە اسىراپ الۋشىلاردىڭ ءبىرىنىڭ ومىردەن وزۋىنا بايلانىستى كەرى قايتارىپ جاتادى. بۇل شامامەن 1 پايىزدان ءسال اساتىن دەڭگەيدە عانا»، - دەدى عاني بەيسەمبايەۆ.
مينيسترلىك ماماندارى جوعارعى سوتتىڭ رەسمي دەرەگىنە سۇيەنە وتىرىپ، كەيىنگى 4 جىلدا 302 بالانى اسىراپ الۋ قۇجاتىنىڭ كۇشى جويىلعانىن ايتادى.
ناقتىراق ايتساق:
2020 -جىلى - 1540 بالا وتباسىعا قابىلدانىپ، 85 بالانى اسىراپ الۋدىڭ كۇشى جويىلعان؛
2021 -جىلى - 1282 قابىلدانىپ، 70 بالانى اسىراپ الۋدىڭ كۇشى جويىلعان؛
2022 -جىلى - 1215 قابىلدانىپ، 72 بالانى اسىراپ الۋدىڭ كۇشى جويىلعان؛
2023 -جىلى - 1181 قابىلدانىپ، 75 بالانى اسىراپ الۋدىڭ كۇشى جويىلعان.
«ايتا كەتۋ كەرەك، بۇل ساندار جەتىم بالالاردى قابىلداعان ادامدارعا عانا ەمەس، سونىمەن قاتار وگەي انالار مەن وگەي اكەلەردىڭ وتباسىلىق اسىراپ الۋىن قامتيدى. بالا اسىراپ الۋدى توقتاتۋ پروتسەدۋراسىنا دا قاتىستى. بارلىق ستاتيكالىق دەرەكتەر زاڭدى كۇشىنە ەنگەن سوت شەشىمدەرى بويىنشا ەسەپتەلەدى. وسى جىلى بالا اسىراپ الۋدان باس تارتۋ پايىزىن قاراستىرۋ دا دۇرىس ەمەس، ويتكەنى جويۋ بىرنەشە جىلدان كەيىن دە بولۋى مۇمكىن. بالا اسىراپ الۋدىڭ كۇشىن جويۋ بويىنشا بارلىق بالادا جەتىم نەمەسە ا ق ق ب ساناتى بولمايدى جانە وگەي اكەلەر، وگەي انالار اسىراپ الۋى مۇمكىن»، - دەپ جازىلعان مينيسترلىكتىڭ قوسىمشا مالىمەتىندە.
سونداي-اق، ول مەكتەپتەردە الگەبرا جانە گەومەتريا پاندەرىن بىرىكتىرىپ وقىتۋ تۋرالى ۇسىنىسقا پىكىر ءبىلدىردى.
اۆتور
ەسىمجان ناقتىباي