اسىراپ العان بالالارىن قورلاعان ەمشى جازالانبايتىن بولدى
شىمكەنت. قازاقپارات - شىمكەنتتە قامقورلىعىنا جانە اسىراپ العان بالالارىنا قورلىق كورسەتتى دەگەن ەمشىگە قاتىستى ىسكە نۇكتە قويىلدى.
شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا ۋ. سمانوۆقا قاتىستى قىلمىستىق كودەكستىڭ 140-بابىنىڭ 2-بولىگى (كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ)، قىلمىستىق كودەكستىڭ 110-بابى 2-بولىگىنىڭ 1,2-تارماقتارى (قيناۋ) بويىنشا سوتقا دەيىنگى تەرگەپ- تەكسەرۋ ورگانىنىڭ مەديتسينالىق سيپاتتاعى ماجبۇرلەۋ شارالارىن قولدانۋ تۋرالى ءوتىنىش حاتىمەن كەلىپ تۇسكەن قىلمىستىق ءىستى قارادى.
سوت- پسيحياتريالىق ساراپتاماسىنىڭ قورىتىندىسىنا سايكەس، ۋ. سمانوۆ سوزىلمالى جانە پسيحيكالىق اۋرۋمەن اۋىرادى جانە ءوز ءىس- ارەكەتتەرىن جاساۋ كەزىندە ەس- ءتۇسسىز جاعدايدا بولعان. ياعني، قىلمىستىق كودەكستىڭ 16-بابىنا سايكەس (ەسى دۇرىس ەمەستىك) قوعامعا قاۋىپتى ءىس- ارەكەتتى جاساعان ۋاقىتتا ەسى دۇرىس ەمەس كۇيدە بولعان، ياعني سوزىلمالى پسيحيكالىق اۋرۋى، پسيحيكاسىنىڭ ۋاقىتشا بۇزىلۋى، اقىل-ەسىنىڭ كەمدىگى نەمەسە پسيحيكاسىنىڭ وزگە دە دەرتكە ۇشىراۋى سالدارىنان ءوزىنىڭ ارەكەتتەرىنىڭ (ارەكەتسىزدىگىنىڭ) ىس جۇزىندەگى سيپاتى مەن قوعامعا قاۋىپتىلىگىن ۇعىنا الماعان نەمەسە ولارعا يە بولا الماعان ادام قىلمىستىق جاۋاپكەرشىلىكتەن بوساتىلادى.
«ۇ. سمانوۆ قىلمىستىق كودەكستىڭ 16-بابىنا سايكەس قىلمىستىق جاۋاپكەرشىلىكتەن بوساتىلسىن. وعان مامانداندىرىلعان ۇلگىدەگى پسيحياتريالىق ستاتسيوناردا ماجبۇرلەپ ەمدەۋ تاعايىندالسىن»، - دەدى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوت ءتوراعاسىنىڭ مىندەتىن اتقارۋشى بولات قارابايەۆ.
بۇدان وزگە جابىق سوت وتىرىسىندا وقۋ- اعارتۋ مينيسترلىگىنە، استانا، الماتى جانە شىمكەنت قالالارىنىڭ ءبىلىم باسقارمالارىنىڭ قورعانشىلىق جانە قامقورشىلىق ورگاندارىنا، سونداي- اق شىمكەنت قالالىق پوليتسيا دەپارتامەنتىنە بالالاردى پسيحيكالىق اۋرۋمەن اۋىراتىن ادامنىڭ قامقورلىعىنا بەرۋ فاكتىسى بويىنشا جەكە قاۋلى شىعارىلدى.
قاۋلى زاڭدى كۇشىنە ەنگەن جوق.
شىمكەنتتە جەرگىلىكتى ەمشىنىڭ 6 بالانى اسىراپ الىپ، ولارعا يت پەن مىسىقتىڭ ەتىن بەرگەنىن، ءۇش جىلدان بەرى ازاپتاپ كەلگەنىن جازعان بولاتىنبىز.