تاراپتار كەڭەيتىلگەن قۇرامدا كەلىسسوزدەر وتكىزىپ، ەكىجاقتى ىنتىماقتاستىقتىڭ دامۋ قارقىنىن تالقىلادى. ەرمەك كوشەربايەۆ قازاقستان مەن اۋستريانىڭ 30 جىلدان استام ۋاقىت بويى بەرىك ەكىجاقتى قاتىناستاردى ساقتاپ كەلە جاتقانىن ايتتى.
- ءسىزدىڭ رەسمي ساپارىڭىز ۇزاقمەرزىمدى ەكىجاقتى ارىپتەستىكتى نىعايتۋداعى ماڭىزدى قادام سانالادى. بۇل ساياسي ديالوگىمىزعا، ۆەنامەن جانە باسقا دا حالىقارالىق ۇيىمدارمەن ىنتىماقتاستىعىمىزعا جاڭا سەرپىن بەرۋگە جاقسى مۇمكىندىك تۋعىزادى. قازاقستان مەن اۋستريا 30 جىلدان استام ۋاقىت بۇرىن - 1992-جىلدىڭ اقپانىندا ديپلوماتيالىق قاتىناستار ورناتقان. بۇگىندە ءبىز ءوزارا سەنىمگە، ورتاق مۇددەلەرگە جانە پراكتيكالىق ىنتىماقتاستىققا نەگىزدەلگەن ناقتى، مازمۇندى ءارى سىندارلى ديالوگتى كورىپ وتىرمىز، - دەدى ەرمەك كوشەربايەۆ ق ر سىرتقى ىستەر مينيسترلىگىندە وتكەن كەزدەسۋدە.
سونداي-اق مينيستر قازاقستان اۋستريانى ماڭىزدى ەۋروپالىق ارىپتەس رەتىندە قاراستىراتىنىن جانە ىنتىماقتاستىقتى ەكىجاقتى ءارى كوپجاقتى فورماتتا ودان ءارى دامىتۋعا نيەتتى ەكەنىن جەتكىزدى.
ءوز كەزەگىندە بەاتە ماينل-رايزينگەر بۇل ساپار بۇرىن قول جەتكىزىلگەن كەلىسىمدەردىڭ جالعاسى ەكەنىن اتاپ ءوتتى.
- ءسىزدى قايتا كورگەنىمە قۋانىشتىمىن. ءسىز ۆەناعا كەلگەندە مەن قازاقستانعا كەلۋگە ۋادە بەرىپ ەدىم، سول ۋادەمدى ورىندادىم. ءبىزدىڭ ىنتىماقتاستىعىمىز وتە جاقسى باعىتتا دامىپ كەلەدى، ال مەنىڭ ىشكى ىستەر مينيسترىمەن بىرگە كەلۋىم اۋستريانىڭ ەكىجاقتى قاتىناستاردى قانشالىقتى جوعارى باعالايتىنىن كورسەتەدى، - دەدى اۋستريالىق ديپلومات.
ونىڭ ايتۋىنشا، ديپلوماتيالىق پاسپورت يەلەرى ءۇشىن ۆيزاسىز رەجيمنىڭ ەنگىزىلۋى جانە اۋستريالىق بيزنەس دەلەگاتسياسىنىڭ كەلۋى قازاقستانمەن ىنتىماقتاستىققا قىزىعۋشىلىقتىڭ ارتىپ كەلە جاتقانىن، سونىڭ ىشىندە ينۆەستيتسيالار مەن ينفراقۇرىلىمدىق جوبالارعا، اسىرەسە ورتا ءدالىز اياسىندا قاتىسۋعا نيەتتى ەكەنىن بىلدىرەدى.
بەاتە ماينل-رايزينگەر ءوز سوزىندە تاراپتار ەنەرگەتيكالىق قاۋىپسىزدىك ماسەلەلەرىن دە تالقىلاعانىن اتاپ ءوتتى. ونىڭ ايتۋىنشا، اۋستريا اسىرەسە ەنەرگەتيكالىق رەسۋرستار جەتكىزۋ سالاسىندا قازاقستانمەن ارىپتەستىكتى جوعارى باعالايدى.
بۇعان دەيىن قازاقستان مەن اۋستريا اراسىنداعى زاڭسىز جۇرگەن ادامداردى رەادميسسيالاۋ جانە ترانزيتتەۋ تۋرالى كەلىسىم راتيفيكاتسيالانعان ەدى.
بىلتىر اۋستريا رەسپۋبليكاسى فەدەرالدىق پارلامەنتى ۇلتتىق كەڭەسىنىڭ ەكىنشى پرەزيدەنتى پەتەر حاۋبنەر استاناعا كەلگەن ەدى.