اۋستريادا سيريالىق ازامات كوشەدەگى ادامدارعا پىشاقپەن شابۋىل جاسادى

استانا. KAZINFORM - اۆستريانىڭ وڭتۇستىگىندەگى، يتاليا جانە سلوۆەنيامەن شەكارالاس ۆيللاح قالاسىنىڭ باس الاڭىندا ەر ادام كۇندىز كەزدەيسوق ءوتىپ بارا جاتقان ادامدارعا پىشاقپەن شابۋىل جاسادى. بۇل تۋرالى BBC حابارلايدى.

- وقيعا ورنىندا 14 جاسار جاس ءوسپىرىم قازا تاۋىپ، تاعى 4 ادام جارالاندى. ولاردىڭ ەكەۋى اۋىر حالدە، - دەپ حابارلادى اۋستريالىق ORF تەلەارناسى.

پوليتسيانىڭ مالىمەتىنشە، جەتكىزۋ قىزمەتىنىڭ جۇرگىزۋشىسى سيريالىق قاسكويدى كولىكپەن قاعىپ، شابۋىلدىڭ ۇدەي تۇسۋىنە جول بەرمەدى.

23 جاستاعى قاندىقول قىلمىسكەر ۇستالىپ، جەكە باسى انىقتالدى.

- سيريادان قاشىپ كەلگەن ونىڭ اۋسترياعا ساياسي باسپانا ىزدەپ كەلگەنى بەلگىلى بولدى. اتالعان مەملەكەتتە سيريالىقتىڭ تۇرۋعا رۇقساتناما قۇجاتى بار، - دەپ حابارلادى پوليتسيا وكىلى راينەر ديونيسيو.

شابۋىلدىڭ سەبەبى ازىرگە بەلگىسىز. تەرگەۋگە پوليتسيانىڭ ەكسترەميزمگە قارسى كۇرەس ءبولىمى قوسىلدى.