اۋستراليا تۇرعىنى 24 جاستاعى ەممانۋەل ليددەن مەندەلەيەۆ كەستەسىندەگى بارلىق حيميالىق ەلەمەنتتى جيناۋ ءۇشىن پلۋتوني ۇلگىلەرىن ساتىپ العان. ەندى ول يادرولىق قارۋدى تاراتپاۋ تۋرالى زاڭدى بۇزعانى ءۇشىن 10 جىلعا دەيىن باس بوستاندىعىنان ايىرىلۋى مۇمكىن .
2023 -جىلعى تامىزدا ليددەن ينتەرنەت ارقىلى پلۋتوني ساتىپ الىپ، ونى اتا- اناسىنىڭ سيدنەيدەگى ۇيىنە جەتكىزۋدى جوسپارلاعان. الايدا، تاپسىرىستى كۋرەر ەمەس، اۋستراليانىڭ شەكارا قىزمەتىنىڭ (ABF) وفيتسەرلەرى، ءورت سوندىرۋشىلەر، پوليتسيا جانە حيميالىق قاۋىپتەرگە قارسى ارنايى كيىمدەگى مەديتسينا قىزمەتكەرلەرى قارسى العان. بۇل جاعداي ەلدە ۇلكەن توتەنشە جاعداي رەجيمىن تۋدىرىپتى.
سوت وتىرىسىندا ليددەن يادرولىق قارۋ جاساۋدى ويلاماعانىن، تەك حيميالىق ەلەمەنتتەردى جيناۋ ونىڭ سۇيىكتى ءىسى ەكەنىن جانە جۇمىستاعى سترەسستى وسىلاي باساتىنىن مالىمدەدى. دەگەنمەن، بۇل وقيعادان كەيىن ول جۇمىسىنان ايىرىلدى.
ليددەن ءوز كىناسىن مويىندادى جانە وعان قاتىستى ۇكىم 11-ساۋىردە شىعارىلادى.
بەيسەن سۇلتان
Сұлтан Бейсен Әл-Фараби атындағы ҚазҰУ-дың журналистика факультетінің түлегі. Еңбек жолын 2007 жылы "Жазушы" баспасында редактор болып бастаған. 2008 жылы "Ара" журналында, 2010-2011 жылы Алматы облысының "Талдықорған кеші" газетінде тілші, 2012 жылы "Талдықорған Севен" газетінде тілші болып жұмыс істеген. 2013 жылы сәуір айынан бастап "ҚазАқпарат" ХАА-нде Төте жазу редакциясында шығарушы редактор болып жұмысқа орналасқан