قازاقستاندا اسىل تۇقىمدى مال باسىنىڭ ساپاسىن ارتتىرۋ، اۋىل شارۋاشىلىعى جانۋارلارىنىڭ تۇقىمدىق ەرەكشەلىكتەرىن جەتىلدىرۋ جانە وتاندىق مال شارۋاشىلىعىنىڭ گەنەتيكالىق الەۋەتىن ارتتىرۋ باعىتىنداعى جۇمىستار جالعاسىپ جاتىر.
سالانى دامىتۋدىڭ ماڭىزدى تەتىكتەرىنىڭ ءبىرى - شەتەلدەن اكەلىنەتىن ساپالى اسىل تۇقىمدى مال باسىن كوبەيتۋ.
- وسى رەتتە اۋستراليادان گەرەفورد جانە ابەردين-انگۋس تۇقىمدارىنا جاتاتىن 250 ءىرى قارا جەتكىزىلدى. مال اقتوبە قالاسىنداعى ءاليا مولداعۇلوۆا اتىنداعى حالىقارالىق اۋەجايعا جەتكىزىلىپ، زاڭنامادا بەلگىلەنگەن ۆەتەريناريالىق راسىمدەردەن ءوتتى. ەلىمىزدىڭ ۆەتەريناريالىق تالاپتارىنا سايكەس، مال 21 كۇن بويى كارانتيندە ۇستالدى. وسى كەزەڭدە ماماندار جانۋارلاردىڭ فيزيولوگيالىق جاعدايىن كەشەندى باعالاپ، ءارقايسىسىن تەكسەرۋدەن وتكىزدى. جۇقپالى اۋرۋلاردىڭ كلينيكالىق بەلگىلەرىنىڭ جوقتىعى جانە ۆەتەريناريالىق ىلەسپە قۇجاتتاردىڭ بەلگىلەنگەن تالاپتارعا سايكەستىگى تەكسەرىلدى. سونداي-اق ۆەتەريناريالىق-سانيتاريالىق نورمالاردىڭ ساقتالۋىنا ەرەكشە نازار اۋدارىلدى،- دەلىنگەن حابارلامادا.
بارلىق قاجەتتى ءراسىم اياقتالعاننان كەيىن باتىس قازاقستان وبلىسى اقجايىق اۋدانى بۋدارينو اۋىلىندا ورنالاسقان «Amaner- IZi» شارۋاشىلىعىنا اپارادى.
اسىل تۇقىمدى مالدى اكەلۋ شارۋاشىلىقتىڭ تابىندىق-گەنەتيكالىق قورىن كەڭەيتىپ، سەلەكتسيالىق-اسىلداندىرۋ جۇمىستارىن جەتىلدىرۋگە تىڭ مۇمكىندىك بەرەدى.
گەرەفورد پەن ابەردين-انگۋس تۇقىمدارى جوعارى ەت ونىمدىلىگىمەن جانە جەرگىلىكتى جاعدايعا بەيىمدەلۋ قاسيەتتەرىمەن ەرەكشەلەنەدى. سوندىقتان ەتتى باعىتتاعى مال شارۋاشىلىعىندا كەڭىنەن قولدانۋعا بولادى.