اۋستراليا پوليتسياسى قىلمىسكەرلەردەن جۇزدەگەن كەسىرتكە تاركىلەدى

Kazinform بۇل تۋرالى BBC گە سىلتەمە جاساپ حابارلايدى.

جاڭا وڭتۇستىك ۋەلس پوليتسياسىنىڭ دەرەگىنشە، جەرگىلىكتى پوليتسيا وكىلدەرى 257 گە جۋىق كەسىرتكە مەن 3 جىلاندى تاركىلەدى.

31-59 جاس ارالىعىنداعى 4 كۇدىكتىگە جەرگىلىكتى رەپتيليالار ەكسپورتى جانە قىلمىستىق توپ مۇشەسى بولدى دەگەن ايىپ تاعىلىپ وتىر. ەگەر ولاردىڭ كىناسى دالەلدەنسە، 15 جىلعا دەيىن باس بوستاندىعىنان ايىرىلۋى مۇمكىن.

باۋىرىمەن جورعالاۋشىلارعا ەم-دوم جاسالىپ، ولار جابايى تابيعاتقا قايتارىلدى.

ايتا كەتەيىك، كەسىرتكەنىڭ نارىقتاعى باعاسى - 1,2 ميلليون اۋستراليالىق دوللار (805 مىڭ ا ق ش دوللارى).

جابايى تابيعات دۇنيەجۇزىلىك قورىنىڭ (WWF) دەرەگى بويىنشا، كەيىنگى 10 جىلدا گونكونگ حالىقارالىق نارىقتا ەكزوتيكالىق جانۋارلار ساۋداسى بويىنشا كوش باستاپ تۇر.