اۋستراليا تۋۆالۋ تۇرعىندارى ءۇشىن ارنايى كليماتتىق ۆيزا ۇسىنادى

استانا. KAZINFORM - ارحيپەلاگ باياۋ باتىپ بارا جاتقاندىقتان، تۋۆالۋ حالقىنىڭ ۇشتەن ءبىرى اۋسترالياعا ارنايى كليماتتىق ۆيزا الۋعا ءوتىنىش ءبىلدىردى، دەپ حابارلايدى Reuters اگەنتتىگى تۋۆالۋدىڭ ب ۇ ۇ- داعى ەلشىسى تاپۋگاو فولەفۋعا سىلتەمە جاساپ.

اۋستراليا مەن تۋۆالۋ 2023 -جىلى ارحيپەلاگ تۇرعىندارىنا كليماتتىق ۆيزا بەرۋ تۋرالى كەلىسىمگە قول قويدى. ەندى، مىنە، مۇنداي ۆيزالاردى راسىمدەۋ مۇمكىندىگى پايدا بولىپ، 1124 ادام ونى پايدالانىپ ۇلگەردى. ءوتىنىش بەرگەندەردىڭ سانى، ونىڭ ىشىندە وتباسى مۇشەلەرى - 4052 ادام. تۋۆالۋدا 11000 نان از حالىق بار.

اۋستراليالىق كليماتتىق ۆيزانى العان تۋۆالۋلىقتار ەلدە تۇرۋ، جۇمىس ىستەۋ جانە وقۋ مۇمكىندىگىنە يە بولادى. سونىمەن قاتار ولار اۋستراليالىقتارمەن بىردەي نەگىزدە دەنساۋلىق ساقتاۋ جانە ءبىلىم بەرۋ قىزمەتتەرىن پايدالانا الادى. جىل سايىن نەبارى 280 ۆيزا ءبولىنىپ، ءوتىنىش بەرۋشىلەر اراسىندا لوتەرەيا ويناتىلادى. فولەفۋ «وسى مۇمكىندىكتى قاراستىراتىن ادامداردىڭ سانىنا تاڭعالعانىن» ايتتى.

تۋۆالۋ - اۋدانى 26 شارشى مەتر جانە 10600 حالقى بار توعىز شاعىن اتوللدان (ساقينا ءتارىزدى مارجان ارالدارى) تۇراتىن ارال مەملەكەتى. عالىمداردىڭ بولجامى بويىنشا، قازىرگى جاھاندىق جىلىنۋ ءۇردىسى ساقتالاتىن بولسا، 2100 -جىلعا قاراي ەل اۋماعىنىڭ 95 پايىزى سۋ استىندا قالادى. سونىمەن بىرگە، كەيبىر ساراپشىلار ارحيپەلاگ 2050 -جىلعا قاراي ادام تۇرۋعا جارامسىز بولادى دەپ وتىر. 2023 -جىلى تۋۆالۋ كونستيتۋتسياسىنا وزگەرىستەر ەنگىزدى، وعان سايكەس مەملەكەت بۇكىل اۋماعى سۋ استىندا قالسا دا ءومىر سۇرە بەرەدى.

ەسكە سالا كەتەيىك، ۆەنەتسيا 2150 -جىلى سۋ استىندا قالۋى مۇمكىن.