استانانىڭ قاي اۋداندارىندا قۇرىلىس قارقىندى جۇرەدى

  الداعى 10 جىلدا استانا حالقى 2,3 ميلليون ادامعا دەيىن وسەدى. ەلوردا اكىمى جەڭىس قاسىمبەك ەسەپتىك كەزدەسۋىندە 2035 -جىلعا دەيىن قالانى دامىتۋدىڭ جاڭا باس جوسپارى جونىندە ايتىپ بەردى، دەپ حابارلايدى Kazinform.

«پرەزيدەنت تاپسىرماسىمەن 2035 -جىلعا دەيىن قالانى دامىتۋدىڭ جاڭا باس جوسپارى ازىرلەنگەن. قالا اۋماعى وزگەرىسسىز 79,7 مىڭ گەكتار بولىپ قالادى. ونىڭ ەداۋىر بولىگىن «جاسىل سىنالار» قۇرايدى، ولار ساياباقتارمەن، ەسىل، اقبۇلاق، سارىبۇلاق وزەندەرىنىڭ جانە نۇرا- ەسىل كانالىنىڭ جاعالاۋلارىمەن بىرگە ءبىرىڭعاي تابيعي- لاندشافتىق كەشەن قۇرادى. جاڭا باس جوسپارعا سايكەس، مىڭجىلدىق اللەياسى، تەلمان تۇرعىن الابى جانە تۇران داڭعىلىنىڭ باتىسىنداعى اۋدان پەرسپەكتيۆالى قۇرىلىس اۋداندارى بولىپ انىقتالدى»، - دەدى اكىم ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

اكىمنىڭ ايتۋىنشا، الداعى 10 جىلدا قالا حالقى 2,3 ميلليون ادامعا دەيىن وسەدى دەپ بولجانۋدا. تۇرعىن ءۇي قورى ەكى ەسەگە ۇلعايادى جانە 68 ميلليون شارشى مەتردەن اسادى.

«جاڭا باس جوسپارعا سايكەس 2035 -جىلعا دەيىن بارلىعى 178 بالاباقشا مەن 164 مەكتەپ، 93 دەنساۋلىق ساقتاۋ مەكەمەسى سالىنادى. باس جوسپار جوباسىن قالا جۇرتشىلىعى، ءماسليحات دەپۋتاتتارى ماقۇلداپ، قاجەتتى ساراپتامالاردان ءوتتى»، - دەدى جەڭىس قاسىمبەك.