استانالىقتار تىنىس الۋ ورگاندارى اۋرۋىمەن ءجيى اۋىرادى

استانا. KAZINFORM - ەلوردادا تىنىس الۋ ورگاندارى اۋرۋلارىنىڭ جيىلىگى جالپى سىرقاتتانۋ قۇرىلىمىندا كوش باستاپ تۇر. وتكەن جىلى تىنىس الۋ ورگاندارى اۋىراتىن 450 مىڭ ادام تىركەلگەن. استانا قالاسىنىڭ كوممۋنيكاتسيالار قىزمەتىندە ۆەيپ پەن شەگىلمەيتىن تەمەكى ونىمدەرىنىڭ زيانى مەن جازالاۋ شارالارى تۋرالى بريفينگ ءوتتى.

«ەلەكتروندى تەمەكىنىڭ كوپشىلىگىندە تاۋەلدىلىك تۋدىراتىن نيكوتين بار. ۆەيپينگتى وكپەنىڭ ون شاقتى اۋرۋىمەن بايلانىستىرۋعا بولادى. ەلوردادا تىنىس الۋ ورگاندارى اۋرۋلارىنىڭ جيىلىگى جالپى سىرقاتتانۋ قۇرىلىمىندا ءبىرىنشى ورىندا تۇر. 2023 -جىلدىڭ قورىتىندىسى بويىنشا استانا قالاسىندا تىنىس الۋ ورگاندارىنىڭ اۋرۋلارىمەن 450 مىڭعا جۋىق ادام، ونىڭ ىشىندە باستاپقى سىرقاتتانۋشىلىقپەن 390 مىڭنان استام ادام تىركەلگەن. بۇل اۋرۋلار وسى ەلەكتروندى تەمەكىدەن دە تۋىنداۋى مۇمكىن»، - دەدى قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى اينۇر تولەۋوۆا استانا كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

قالالىق پسيحيكالىق دەنساۋلىق ورتالىعىنىڭ پسيحياتر- ناركولوگ دارىگەرى انار تاستامبەكوۆانىڭ ايتۋىنشا، ۆەيپينگ شەگۋشىلەردىڭ وزدەرىنە عانا ەمەس، اينالاسىنداعىلارعا دا زياندى.

«عالىمدار ەلەكتروندى تەمەكى شەگەتىن ادامنىڭ جانىندا 30 مينۋت بولعان ادامنىڭ جاسۋشالارىندا توتىعۋ سترەسسى جوعارىلايتىنىن انىقتادى. بۇل دەنەدە بوس راديكالدار مەن انتيوكسيدانتتار اراسىندا ديسبالانس بولعان كەزدە پايدا بولادى. ۋاقىت وتە كەلە مۇنداي ديسبالانس جۇرەك-قان تامىرلارى، وكپە جانە نەۆرولوگيالىق اۋرۋلاردىڭ، سونداي-اق ونكولوگيانىڭ دامۋىندا ماڭىزدى ءرول اتقارۋى مۇمكىن»، - دەيدى دارىگەر.

«حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە سايكەس تەمەكى شەكپەيتىن جانە ەلىكتەيتىن تەمەكى ونىمدەرىن اكەلۋگە، وندىرۋگە، ساتۋعا جانە تاراتۋعا تىيىم سالىنادى.

رۇقسات ەتىلمەگەن جەرلەردە تەمەكى ونىمدەرىن ساتۋ نەمەسە تاراتۋ فاكتىلەرى انىقتالسا، پوليتسيا قىزمەتكەرلەرى اكىمشىلىك قۇقىقبۇزۋشىلىقتار تۋرالى كودەكستىڭ 196-بابى بويىنشا اكىمشىلىك ءىس قوزعايدى.

جىل باسىنان بەرى 70 كە جۋىق اكىمشىلىك حاتتاما تولتىرىلعان.

«بەلگىلەنبەگەن ورىنداردا يميتاتسيالىق تەمەكى ونىمدەرىن ساتۋ نەمەسە تاراتۋ فاكتىلەرى انىقتالعان كەزدە تەمەكى ونىمدەرىن ساتۋ فاكتىسى بويىنشا اكىمشىلىك ءىس قوزعالادى. وندا قىزدىرىلاتىن تەمەكىسى بار بۇيىمداردى كاليانعا، كاليان قوسپاسىنا، تەمەكىنى قىزدىرۋعا ارنالعان جۇيەلەرگە، ەلەكتروندىق تۇتىنۋ جۇيەلەرى مەن ولاردىڭ سۇيىقتىقتارىن ساتۋ فاكتىسى بويىنشا اكىمشىلىك ءىس قوزعالادى. بۇل ارەكەت جەكە تۇلعالارعا - 30 ا ە ك دەيىن، شاعىن كاسىپكەرلىك سۋبەكتىلەرىنە - 50 ا ە ك، ورتا كاسىپكەرلىك سۋبەكتىلەرىنە - 80 ا ە ك، ءىرى كاسىپكەرلىك سۋبەكتىلەرىنە - 100 ا ە ك ايىپپۇل سالۋعا اكەپ سوعادى. جىل باسىنان بەرى وسىنداي فاكتىلەر بويىنشا 7 اكىمشىلىك حاتتاما تولتىرىلدى»، - دەدى ە. دانياروۆ.

اۆتور
ايجان سەرىكجان قىزى