استانالىقتار پاريج وليمپياداسىنىڭ اشىلۋىن اشىق اسپان استىندا تاماشالادى
استانا. KAZINFORM - قازىر پاريج-2024 وليمپياداسى سالتاناتتى اشىلۋ ءراسىمى ءوتىپ جاتىر. Jibek Joly تەلەارناسى ەلوردا تۇرعىندارى مەن قوناقتارى ءۇشىن اۋقىمدى شارادان تىكەلەي ترانسلياتسيا جاسادى.
ەلوردانىڭ ورتالىق ساياباعىنا ءبىر قاۋىم جۇرت جينالدى. كورەرمەندەر ۇلكەن ەكران ارقىلى پاريج وليمپياداسىنىڭ اشىلۋىنا تىكەلەي كۋا بولدى. قازاقستاندىق سپورتشىلاردى قولداۋعا كەلگەن جۇرتشىلىق الدىمەن وتاندىق جۇلدىزداردىڭ قاتىسۋىمەن وتكەن كونتسەرتتى تاماشالادى.
«ەلىمىزدى الەمگە تانىتىپ جاتقان سپورتشىلارىمىز كوپ. پاريج وليمپياداسىن مىندەتتى تۇردە كورەمىن، وزىمە بوكس جاقىن. جالپى قازاقستان بوكستان الەمدە ۇزدىك ەلدەردىڭ قاتارىندا. سپورتشىلارىمىزعا ساتتىلىك تىلەيمىن، تەك جۇلدەمەن ورالسىن»، - دەگەن تىلەك ءبىلدىردى تانىمال ءانشى، كومپوزيتور لۇقپان جولداسوۆ.
ورتالىق ساياباققا جينالعانداردىڭ اراسىندا وليمپياداعا اتتانعان سپورتشىلاردى قولداپ، ۇرانداتقان كورەرمەندەردى دە بايقادىق. سولاردىڭ ءبىرقاتارىندا «العا، قازاقستان!»، «ءبىز بىرگەمىز!»، «اسلانبەك، العا!»، «سمەتوۆ چەمپيون»، «ءبىز سىزدەرگە سەنەمىز»، «جەڭىسپەن ورالىڭدار»، «كازاحستانۋ تولكو پوبەدۋ» دەگەن سەكىلدى قولداۋ لەبىزدەرى جازىلعان.
«وليمپيادا الەمدىك دەڭگەيدەگى سپورتتىق مەرەكە. بۇگىن قازاقستاندىق سپورتشىلاردى قولداۋعا ارنايى كەلدىم، ءبىر جاعىنان كورەرمەندەردى انىممەن قۋانتقىم كەلدى. بارشا وتانداستارىمىزدى ءبىزدىڭ سپورتشىلاردى قولداۋعا شاقىرامىن. ال سپورتشىلارعا ۇلكەن جەڭىس تىلەيمىن. ارينە وليمپيادانى مىندەتتى تۇردە كورەمىن»، - دەپ اعىنان جارىلدى بەلگىلى ءانشى زارينا وماروۆا.
بۇعان دەيىن Jibek Joly ارناسى پاريج وليمپياداسىنان حابار تاراتۋعا تاس- ءتۇيىن دايىن ەكەندىگىن حابارلاعان ەدىك.
ايتا كەتەيىك، پاريج وليمپياداسىنىڭ اشىلۋ سالتاناتىنا وراي استانالىقتار ورتالىق ساياباققا جينالدى. Jibek Joly تەلەارناسى ۇجىمىنىڭ ۇيىمداستىرۋىمەن وتكىزىلگەن كەشتە استانالىقتار سپورتشىلارىمىزعا ساتتىلىك تىلەدى.
اۆتور
داۋلەت ىزتىلەۋ