استانالىقتار پاريج وليمپياداسىنىڭ اشىلۋ سالتاناتىن اشىق اسپان استىندا تاماشالاي الادى

استانا. KAZINFORM - بۇگىن پاريج-2024 وليمپياداسى سالتاناتتى تۇردە اشىلادى. Jibek Joly تەلەارناسى ەلوردا تۇرعىندارى مەن قوناقتارى ءۇشىن پاريج وليمپياداسىنىڭ اشىلۋ سالتاناتىن تىكەلەي ەفيردە، اشىق اسپان استىندا تاماشالاۋدى ۇسىنادى.

«ءبىزدىڭ تەلەارنا ءۇشىن پاريج وليمپياداسىن تىكەلەي كورسەتىلىمدە تاراتۋ - تاريحي وقيعا. حالىقارالىق وليمپيادا كوميتەتىنە سپورتتىق ويىنداردى تاراتاتىن تەلەارنا رەتىندە رەسمي تىركەۋ جونىندە ءوتىنىم جولدادىق. ەكى اپتانىڭ ىشىندە تىركەدى. كەلىسىمگە سايكەس وليمپيادا ويىندارىن تىكەلەي كورسەتىلىم ارقىلى كوپشىلىككە تاراتا الامىز. Jibek Joly تەلەارناسىنىڭ كورەرمەندەرى ءار جۇما، سەنبى جانە جەكسەنبى كۇنى (ساعات 22:00- گە دەيىن) تەلەديداردان بولەك، ەلورداداعى Abu Dhabi Plaza ويىن-ساۋىق جانە ساۋدا ورتالىعى اۋماعىندا LED ەكران ارقىلى كورە الادى»، - دەيدى Jibek Joly تەلەارناسىنىڭ كرەاتيۆتى پروديۋسەرى دينارا اباكايەۆا.

بۇگىن ساعات 22:30-دا Jibek Joly تەلەارناسى ەلوردا اكىمدىگىنىڭ قولداۋىمەن پاريج وليمپياداسىنىڭ اشىلۋ سالتاناتىن ورتالىق ساياباقتا تىكەلەي ەفيردە كوپشىلىكتىڭ نازارىنا ۇسىنادى. سالتاناتتى شارا اياسىندا كونسەرت تە وتەدى.

بۇعان دەيىن Jibek Joly تەلەارناسىنىڭ پاريج وليمپياداسىنان تىكەلەي ترانسلياتسياعا دايىندىق جۇمىستارى تۋرالى ايتىپ بەرگەن ەدىك. تەلەارنا ەفيرىنىڭ شامامەن 70 پايىزى پاريج وليمپياداسى ويىندارىنا ارنالادى.

وليمپيادا كەستەسىنە سايكەس، تەلەارنا كورەرمەندەرى 27-شىلدە كۇنى ساعات 15:00-دە ۇلكەن تەننيستى تاماشالاي الادى، ال ساعات 23:30-دا جۇزۋدەن جارتىلاي فينال جانە فينال وتەدى.

28-شىلدە كۇنى ساعات 12:30-دا سەمسەرلەسۋ، ساعات 17:10-دا سپورتتىق گيمناستيكادان ەرلەر اراسىندا فينال وتەدى جانە ساعات 22:00-دە سەمسەرلەسۋدەن فينال كورسەتىلەدى.

اۆتور

داۋلەت ىزتىلەۋ