استانادان موڭعولياعا بارا جاتقان اۆتوبۋس ورتەنىپ كەتتى: قازاقستاندىقتار زارداپ شەكتى مە

استانا. KAZINFORM - استانا-بايان-ولگەي باعىتىندا كەلە جاتىپ ورتەنگەن اۆتوبۋستا قازاقستاندىقتار زارداپ شەككەن جوق، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

توتەنشە جاعدايلار مينيسترلىگىنىڭ التاي رەسپۋبليكاسى بويىنشا باس باسقارماسىنىڭ مالىمەتىنشە، ورتەنگەن اۆتوبۋستىڭ بارلىق جولاۋشىسى قازاقستان ازاماتتارى بولعان. ولار كەشە رەسەي-موڭعوليا شەكاراسىن كەسىپ ءوتىپ، كولىك كومپانياسى بەرگەن قوسىمشا اۆتوبۋسپەن بايان-ولگەيگە ساپارىن جالعاستىردى.

قازاقستان رەسپۋبليكاسىنىڭ ومبىداعى باس كونسۋلدىعىنىڭ مالىمەتىنشە، وسى وقيعاعا قاتىستى وتانداستار تاراپىنان شەتەلدىك مەكەمەگە وتىنىشتەر تۇسكەن جوق.

بۇرىن حابارلانعانداي، توتەنشە جاعداي سەنبى كۇنى تاڭەرتەڭ التاي رەسپۋبليكاسىنىڭ وڭگۋداي اۋدانىنداعى تاس جولدا بولعان. اۆتوبۋس شامامەن تاڭعى ساعات 6 دا «چۋيسكي تراكت» ر-256 تاس جولىنىڭ 720-شاقىرىمىندا ورتەنگەن.

سالوندا 50 ادام بولعان، ونىڭ 15 ءى بالا. بارلىعى وزدىگىنەن ەۆاكۋاتسيالانعان، قازا تاپقاندار مەن زارداپ شەككەندەر جوق. ءبىر ساعاتتىڭ ىشىندە ءورت ءسوندىرىلدى. وسىدان كەيىن جولاۋشىلار ينيا اۋىلىنداعى ۋاقىتشا ورنالاستىرۋ پۋنكتىنە جەتكىزىلدى.