استانادان بۋرابايعا جاڭا جىلدىق ارنايى پويىز اتتاندى

جاڭا جىل قارساڭىندا برەندتەلگەن جاڭا جىلدىق №7507/7508 ەلەكتر پويىزىنىڭ العاشقى رەيسى استانادان بۋراباي كۋرورتىنا اتتاندى. بۇل ق ر تۋريزم جانە سپورت مينيسترلىگى «Kazakh Tourism» ۇلتتىق كومپانياسى مەن «جولاۋشىلار تاسىمالى» ا ق-نىڭ بىرلەسكەن جوباسى.

ق ر تۋريزم مينيسترلىگى باسپا ءسوز قىزمەتىنىڭ حابارلاۋىنشا، ەرەكشە پويىز سىرتىنان دا، ىشىنەن دە بەزەندىرىلىپ، جولاۋشىلار ءۇشىن مەرەكەلىك كوڭىل-كۇي سىيلايدى.

جاڭا جىلدىڭ باستى كەيىپكەرلەرى - اياز اتا مەن اقشاقار جولاۋشىلاردى كەلە جاتقان مەرەكەمەن قۇتتىقتاپ، سىيلىقتار تابىستايدى. ولاردىڭ رولىندە - ۆاگونداردىڭ جولسەرىكتەرى.

مەرەكەلىك بەزەندىرىلگەن قۇرام جاڭا جىلدىق دەمالىس ماۋسىمى اياقتالعانعا دەيىن جۇرەدى.

«ەكىنشى جىل قاتارىنان ءبىز جاڭا جىل قارساڭىندا ق ت ج-مەن بىرلەسىپ، برەندتەلگەن تۋريستىك پويىزداردى ىسكە قوسىپ وتىرمىز. مۇنداي پويىزدار مەرەكەلىك كوڭىل-كۇي سىيلاپ قانا قويماي، تۋريستەردى دە تارتادى»، - دەدى ق ر تۋريزم جانە سپورت ۆيتسە- ءمينيسترى ەرجان ەركىنبايەۆ.

بۇل رەتتە وتكەن جىلى جاڭا جىلدىق ەلەكتر پويىزىمەن 16 مىڭنان استام جولاۋشى تاسىمالداندى.

مەرەكەلىك قۇرام 28-جەلتوقساننان باستاپ اپتاسىنا بەس رەت جۇرەدى. ەلوردادان بۋراباي كۋرورتىنا پويىز نۇرلى جول ۆوكزالىنان ساعات 06:12 دە جونەلتىلەدى. سونىمەن قاتار، ەلوردا تۇرعىندارى مەن قوناقتارىنا ىڭعايلى بولۋ ءۇشىن پويىزعا استانا-1 ۆوكزالىنان دا وتىرعىزۋ قاراستىرىلعان. بۇل جەرگە ەكسپرەسس تاڭعى ساعات 06:37 دە كەلىپ، 07:00 دە جۇرەدى.

تۋريستىك پويىزدى ىسكە قوسۋ اياسىندا ق ر پ ءى ب «بۋراباي دامۋ» ج ش س ەرەكشە رەيستىڭ كەستەسىنە سايكەس قىسقا تۋر قالىپتاستىردى. جاڭا جىلدىق مەرەكەنى جالعاستىرۋ ماقساتىندا، بۋرابايداعى سانتا رەزيدەنسياسىنا بارىپ، بۋرابايلاندتا تاڭعاجايىپ كۇن وتكىزۋ ۇسىنىلادى. مۇندا بۇعى نەمەسە يت جەگىلگەن اربامەن، كۆادروسيكلمەن، قاردا جۇرەتىن كولىكتەرمەن سەرۋەندەۋگە، اتقا مىنۋگە بولادى.

سوڭعى جىلدارى بۋراباي جىل مەزگىلىنە قاراماستان، جازدا جاعاجاي دەمالىسىن، كۇزدە جانە كوكتەمدە ساۋىقتىرۋ تۋريزمىن، ال قىستا كەرەمەت جاڭا جىلدىق اتموسفەرانى ۇسىناتىن تارتىمدى دەمالىس ورنى رەتىندە تانىمال.

وسىلايشا، جاڭا جىلدىق تۋريستىك پويىز - ايماققا قوسىمشا تۋريستەر اعىنىن تارتاتىن ءارى جەرگىلىكتى تۋروپەراتورلاردىڭ بەلسەندىلىگىن قامتاماسىز ەتەتىن ماۋسىمدىق جەرگىلىكتى ءونىم.