استاناداعى تالدىكولدە قانداي جۇمىس جۇرگىزىلىپ جاتىر

استانا. KAZINFORM - استاناداعى كىشى تالدىكول كولى رەتكە كەلتىرىلەدى. بۇعان دەيىن جاقىن ماڭداعى اۋدان تۇرعىندارى جاڭبىردان كەيىنگى باتپاقتى يىسكە شاعىمدانعان ەدى.

ەكولوگيا مينيسترلىگىنىڭ دەرەگىنشە، كىشى تالدىكول اينالاسىنداعى بەلسەندى قۇرىلىس، كولدىڭ جاساندى تۇردە قۇرعاتىلۋى جانە لاستانۋى جانە كىشى تالدىكول ەكوجۇيەسىن باسقارۋدا كەشەندى ءتاسىلدىڭ بولماۋى سەكىلدى ءبىرقاتار ماسەلە ءالى دە ساقتالىپ وتىر.

ەكولوگيا مينيسترلىگى «SOS Taldykol» قوعامدىق بىرلەستىگىمەن بىرگە كولدەر توبىن ساقتاۋ جانە قالپىنا كەلتىرۋ بويىنشا جول كارتاسىن ازىرلەپ، ونى قالا اكىمدىگىنە قاراۋعا جىبەرگەن.

بىلتىر «elorda Eco System» كومپانياسى كولگە لاس سۋ اعىزعانى ءۇشىن 1476800 تەڭگە كولەمىندە ايىپپۇل تولەگەن.

قازىرگى ۋاقىتتا ۋربانيستيكا ورتالىعىنىڭ قاتىسۋىمەن جۇمىس توبى قۇرىلىپ جاتىر. بۇل توپقا «SOS Taldykol» ۇيىمىنىڭ وكىلدەرى مەن بريتاندىق LDA Design كومپانياسىنىڭ ماماندارى كىردى. ولار № 5 جانە № 7 ۋچاسكەلەردى ەگجەي- تەگجەيلى زەرتتەپ، اباتتاندىرۋ جوسپارى مەن ەكولوگيالىق شەشىمدەردى ازىرلەيدى. جوبانى 2025 -جىلدىڭ ەكىنشى توقسانىندا اياقتاۋ جوسپارلانىپ وتىر.

كولدى تازارتۋ بويىنشا اكىمدىك وتكىزگەن تەندەردە «ارعىن ستروي 2015» ج ش س جەڭىمپاز بولعان. كەلىسىمشارت سوماسى - 267 ميلليون تەڭگە.

ايتا كەتەيىك، كىشى تالدىكول - جاي عانا سۋ ايدىنى ەمەس، ەلوردانىڭ ميكروكليماتىنا اسەر ەتەتىن ماڭىزدى ەكوجۇيە، بيولوگيالىق الۋانتۇرلىلىكتىڭ كوزى جانە سيرەك قۇستاردىڭ مەكەندەيتىن ورنى. كول جەراستى سۋلارىنىڭ دەڭگەيىن رەتتەۋگە كومەكتەسىپ، قولايلى قالالىق ورتانىڭ قالىپتاسۋىنا ىقپال ەتەدى. بەلسەندىلەردىڭ پىكىرىنشە، كولدى قۇرعاتۋ مەن قۇرىلىس جۇرگىزۋ كليماتتىڭ ناشارلاۋىنا، شاڭدى داۋىلداردىڭ جيىلەۋىنە جانە سۋ تاپشىلىعىنا اكەپ سوعادى.

2022 -جىلى سوت ەكولوگيا، گەولوگيا جانە تابيعي رەسۋرستار مينيسترلىگىنىڭ ماماندارىنا كولدەر توبىن زەرتتەۋدى تاپسىرعان. ماماندار قورىتىندىسى بويىنشا، كولدەر توبى شارتتى تۇردە 9 ۋچاسكەگە بولىنگەن. 1 جانە 2-ۋچاسكەلەر - ۇلكەن تالدىكول. كىشى تالدىكولگە قاتىستى: 3, 4, 5 جانە 8-ۋچاسكەلەرى قۇرعاتىلعان جانە ءىشىنارا قۇرىلىس جۇرگىزىلگەن. ول كەزدە الەۋمەتتىك نىساندار مەن تۇرعىن ۇيلەردىڭ قۇرىلىسى ءجۇرىپ جاتقان.

كەيىن قازاقستاننىڭ بيولۋانتۇرلىلىكتى ساقتاۋ قاۋىمداستىعىنىڭ مامانى كىشى تالدىكولدى ءالى دە ساقتاپ قالۋعا بولاتىنىن ايتىپ، بۇل اۋماقتا تىركەلگەن فلورا، فاۋنا تۇرلەرىن اتادى.