استاناداعى كەپتەلىستەن تۇرعىندار دىتتەگەن جەرىنە ۋاقتىلى جەتە الماي تۇر
استانا. KAZINFORM - بۇگىن تاڭەرتەڭ ەلوردادا اۋقىمدى كولىك كەپتەلىسى باستالدى. وسىعان وراي اگەنتتىك ءتىلشىسى قالانىڭ قاي كوشەلەرىنىڭ جابىق ەكەنىن انىقتاپ كوردى.
استانا اكىمدىگىنىڭ دەرەگىنشە، بۇگىندە سول جاعالاۋداعى جولداردى ورتاشا جوندەۋگە قاتىستى احۋال مىناداي:
سارايشىق كوشەسى ب. مومىش ۇلى داڭعىلىنان تۇران داڭعىلىنا دەيىن جولدىڭ ۇستىنگى جابىنىن توسەۋ ءۇشىن تولىق جابىق. جوندە جۇمىستارىن 17-ماۋسىم كۇنى ساعات 6:00-دە اياقتاۋ جوسپارلانعان.
قابانباي باتىر مەن ۇلى دالا داڭعىلدارىنىڭ قيىلىسى دا جابىق تۇر. بۇل ارالىقتاعى جوندەۋ جۇمىستارى بۇگىن كەشكى ساعات 23:00-گە قاراي اياقتالادى.
قابانباي باتىر داڭعىلىنىڭ ۇلى دالا مەن حۋسەي بەن تالال كوشەسىنە دەيىنگى ارالىعىندا دا كولىك جۇرە المايدى. بۇل ۋچاسكەدەگى دە جوندەۋ جۇمىستارى بۇگىن كەشكە بىتەدى.
اكىمدىك ماڭگىلىك ەل داڭعىلى جاقتان مارال كوپىرىنىڭ جولى دا جابىق تۇرعانىن ەسكەرتەدى. قازىرگى ۋاقىتتا تاۋەلسىزدىك كوپىرىمەن كولىك قاتىناپ جاتىر.
«بيىل جول ينفراقۇرىلىمىنا باسىمدىق بەرىلەدى. سوعان وراي وسى جىلى جولداردى سالۋ جانە جوندەۋ جۇمىستارىنىڭ كولەمى ارتادى. بۇل رەتتە كليماتتىق اۋا رايى جاعدايىن ەسكەرەر بولساق، جول جوندەۋ ماۋسىمىنىڭ قىسقا ەكەندىگىن اتاپ وتەمىز. سول سەبەپتى جولشىلار بىردەن بىرنەشە كوشەنى جوندەپ جاتىر. دەگەنمەن، جول قوزعالىسى دا ەسكەرىلەدى. جۇمىستاردىڭ بولىگى اياقتالدى»، - دەپ اتاپ وتەدى اكىمدىكتىڭ باسپا ءسوز قىزمەتى.
ەستەرىڭىزگە سالا كەتەيىك، مامىر ايىنىڭ باسىنان استانادا اۋقىمدى جول جوندەۋ ماۋسىمى باستالدى. ەلوردا اكىمدىگى قازان ايىنا دەيىن 51 كوشەنى جوندەمەك. جوسپارعا سايكەس، جول جابىنىن ورتاشا جوندەۋ جالپى ۇزىندىعى 53,8 شاقىرىمدى قۇرايتىن 51 كوشەدە جۇرگىزىلىپ جاتىر.
اۆتور
مارلان جيەمباي