استاناداعى جاڭادان قۇرىلعان التىنشى اۋدان قالاي اتالادى؟

استانا. KAZINFORM - استانادا جاڭادان التىنشى اۋدان قۇرىلدى. بۇگىن ونىڭ اتاۋى قالالىق قوعامدىق كەڭەستە ءبىراۋىزدان ماقۇلداندى.

سونىمەن، ونوماستيكالىق كوميسسيانىڭ وتىرىسىنا 4 نۇسقا ۇسىنىلعان.

«جەرۇيىق، تۇران، ساۋران جانە سارايشىق. سوڭعىسى جازۋشىلار مەن تاريحشىلاردىڭ دا كوڭىلىنەن شىعىپ، كوپشىلىك سول اتاۋعا توقتاعان. سەبەبى قازاق حاندىعىنىڭ استاناسى بولعان جەر. مادەنيەتتەن بولەك، ساياسي جانە ساۋدا ورتالىعى رەتىندە تاريحتان بەلگىلى. ءتىپتى، كارىزدىك جۇيەلەرىنە دەيىن قالىپتاسقان وركەنيەتتى مەكەن. سوندىقتان سارايشىق اتاۋى قولداۋ تاپتى»، - دەيدى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ.

ونىڭ ايتۋىنشا، الماتى اۋدانى ەكىگە ءبولىنىپ، جاڭا اۋدان قۇرىلدى. جاڭا اۋداندى تاريحي، يدەيالىق ءارى مازمۇنى جاعىنان ايشىقتاۋ كەرەك.

«سارايشىقتى تاڭداپ الدىق. سەبەبى سارايشىق - قازاق دالاسىنداعى ەڭ كونە تاريحي ورىن. 12 اۋليە بايىز تاپقان. جۇزدەن اسا حان بيلىك قۇرعان. جەتى حاننىڭ سۇيەگى مەن ءبىر حاننىڭ باسى جەرلەنگەن. ونىڭ ۇستىنە استانانىڭ الماتى، بايقوڭىر، ەسىل، نۇرا، سارىارقا اتتى 5 اكىمشىلىك ءبولىنىسى ەلىمىزدىڭ ءار وڭىرىنەن سىر شەرتسە، سارايشىق باتىس اتىراپپەن بايلانىستى. وسىلايشا ءتورت قۇبىلا تۇگەندەلىپ تۇر»، - دەيدى باسقارما باسشىسى.