استاناداعى ءدامحانادا جاپپاي ۋلانۋ: تەكسەرىس ناتيجەلەرى بەلگىلى بولدى

استانا. KAZINFORM - استاناداعى «Koktem» ءدامحاناسىنىڭ باسقارۋشى ديرەكتورى دانيار بايتوقوۆ جاپپاي ۋلانۋعا سەبەپ بولعان - سانيتارلىق تالاپتارعا ساي كەلمەيتىن شيكى ەت پارتياسى ەكەنىن حابارلادى.

ەسكە سالا كەتەيىك، 17-ساۋىردە استاناداعى تانىمال ءدامحانالاردىڭ بىرىندە 10 شاقتى ادام ۋلانعان بولاتىن.

- ءبىز زەرتحانالىق تالداۋ ناتيجەلەرىن الدىق. ءدامحانامىزعا سانيتارلىق نورمالارعا ساي كەلمەيتىن ءونىم جەتكىزىلگەنى انىقتالدى. سونىمەن قاتار، اسحانامىزدىڭ تولىقتاي تازا ەكەنى تۋرالى قورىتىندى دا قولىمىزعا ءتيدى. ناقتى ۋلانۋ كوزى - سىرتتان جەتكىزىلگەن شيكى ەت. قازىر استانا قالاسى پوليتسيا دەپارتامەنتى مەن سەس بىرلەسىپ رەسمي تەرگەۋ جۇرگىزىپ جاتىر. ءبىز ءتيىستى ورگاندارمەن اشىق جۇمىس ىستەپ، بارلىق قاجەتتى اقپاراتتى بەردىك، - دەپ مالىمدەدى دانيار بايتوقوۆ Instagram پاراقشاسىندا.

ول قابىلدانعان شارالار تۋرالى دا ايتتى:

بارلىق ءونىم جويىلدى؛

بارلىق جابدىق پەن ءۇي-جايلار تولىقتاي جۋىلىپ، تازالانىپ، دەزينفەكتسيالاندى؛

شيكىزاتتى قابىلداۋدان باستاپ، تاعام دايىنداۋعا دەيىنگى بارلىق كەزەڭ قايتا تەكسەرىلدى؛

سانيتارلىق تالاپتار كۇشەيتىلىپ، قىزمەتكەرلەر قايتا وقىتىلدى؛

شتاتقا سانيتار دارىگەر ەنگىزىلدى؛

بارلىق ايماقتار كاسىبي تۇردە حيميالىق وڭدەۋدەن وتكىزىلدى.

- ءبىز ءدامحانانى بارلىق پروتسەستەردىڭ 0 قاۋىپسىز ەكەنىنە كوز جەتكىزگەننەن كەيىن عانا قايتا اشامىز. ءبىز سەنىمدى اقتامادىق جانە بۇل ءۇشىن جاۋاپتىمىز. بولعان وقيعانى وزگەرتە المايمىز، ءبىراق بۇدان بىلاي مۇنداي جاعدايدىڭ قايتالانباۋى ءۇشىن بار كۇشىمىزدى سالامىز، - دەدى بايتوقوۆ.

بۇعان دەيىن بۇل وقيعاعا بايلانىستى سوتقا دەيىنگى تەرگەۋ باستالعانى حابارلانعان.