استاناداعى اسكەري پارادقا قاتىسىپ جاتقان ۇشاقتار تۋرالى نە بىلەمىز
استانا. kazinform - جەڭىستىڭ 80 جىلدىعىنا ارنالعان اسكەري پارادقا اۋەدەن 66 ۇشۋ اپپاراتى قاتىستى. Kazinform وسى اۋە تەحنيكالارىنا سيپاتتاما ۇسىنادى.
قازاقستان رەسپۋبليكاسىنىڭ مەملەكەتتىك تۋى مەن قارۋلى كۇشتەردىڭ تۋىن الىپ ۇشقان - مي-171 تىكۇشاقتارى.
ورتاشا كوپ ماقساتتى مي-17 تىكۇشاعى ءوزىنىڭ امبەباپتىعى مەن بيىك ۇشاتىن قابىلەتىنىڭ ارقاسىندا الەمدەگى ەڭ كەڭ تارالعان تىكۇشاقتاردىڭ ءبىرى بولىپ سانالادى.
ول قۇرلىق اسكەرى بولىمشەلەرىنىڭ ۇتقىرلىعىن ارتتىرىپ، قارۋ-جاراق پەن جەكە قۇرامدى جەتكىزۋگە، سونداي-اق بەرىلگەن نىسانالاردى جويۋعا ارنالعان. سونداي-اق، تاۋلى مەكەندەردە جانە جوعارى تەمپەراتۋرادا جاۋىنگەرلىك تاپسىرمالاردى ورىنداۋعا قاۋقارلى.
مي-35 م جاۋىنگەرلىك تىكۇشاعى ۇرىس دالاسىنداعى اتىستا قۇرلىق اسكەرىن اۋەدەن قولداۋعا ارنالعان. تىكۇشاقتىڭ جوياتىن نەگىزگى نىساندارى قارسىلاستىڭ ساۋىتتى تەحنيكاسى مەن ءتىرى كۇشى.
مي-8 جانە مي-171 ارميا اۆياتسياسىنىڭ تىكۇشاقتارىن دەسانتتى تۇسىرۋگە جانە ونى اتىس كەزىندە اۋەدەن قولداۋعا، اتىس نۇكتەلەرىن قۇرتىپ، وق- دارىلەردى، قارۋدى، جۇكتەردى، ونىمدەردى، ءدارى-دارمەكتەردى تاسىمالداۋعا، جاۋ قيمىلىنا كەدەرگى جاساۋعا، سونداي-اق جارالىلاردى ۇرىس دالاسىنان ەۆاكۋاتسيالاۋعا پايدالانادى.
توتەنشە جاعدايلار مينيسترلىگىنىڭ ە و-145 جانە ن-145 تىكۇشاقتارى توتەنشە جاعداي بولعان ايماقتاردان زارداپ شەككەندەردى قۇتقارۋعا، تابيعي اپاتتاردىڭ سالدارىن جويۋعا، گۋمانيتارلىق جۇكتەردى تاسىمالداۋعا، ىزدەستىرۋ- قۇتقارۋ جۇمىستارىنا، ورتتەردى ءسوندىرىپ، مەديتسينالىق كومەكتى سۇيەمەلدەۋگە ارنالعان.
C-295 ۇشاعى 9 تونناعا دەيىن جۇك نە تولىق قارۋلانعان 70 تەي اسكەري قىزمەتشىنى تاسىمالداۋعا، سونداي-اق 5000 شاقىرىمعا دەيىنگى قاشىقتىقتى ەڭسەرۋگە قابىلەتتى.
C-295 زاماناۋي ناۆيگاتسيالىق جۇيەمەن جانە قوزعالتقىشتاردىڭ جۇمىسىن باقىلاۋ جۇيەسىمەن جاراقتالعان.
L-410 - بۇل جەڭىل كوپ ماقساتتى قوس موتورلى ترانسپورتتىق جانە جولاۋشىلارعا ارنالعان ۇشاق، قونۋعا ارنالماعان جەرگە، ءشوپ، قار باسقان الاڭقايلارعا جانە ۇشۋ- قونۋ جولاعى قىسقا اۋەايلاقتارعا قونا بەرەدى. 19 جولاۋشىنى نەمەسە 1500 شاقىرىمعا دەيىن 1800 كەلى جۇكتى تاسىمالداۋعا قابىلەتتى.
L-39 ەكى ورىندىق وقۋ- جاۋىنگەرلىك ۇشاعى اۋە كۇشتەرىنىڭ كۋرسانتتارىن كەز كەلگەن اۋا رايى جاعدايىندا ۇشۋعا ۇيرەتۋگە قولدانىلادى. ول اۋەدە، قۇرلىقتا جانە تەڭىزدە ءىس- قيمىل داعدىلارىن جاتتىقتىرۋعا بىردەي پايدالانىلادى. بۇل دايىندىقتىڭ باستاپقى كەزەڭىندەگى وقۋ- جاتتىعۋ ۇشاعى كۇندىزگى جانە تۇنگى رەيستەردى، اۋە نىساندارىن بارلاۋدى، جەر بەتىندەگى نىساندارعا سوققى بەرۋدى پىسىقتاۋ ءۇشىن قولدانىلادى.
تۋ-154 ۇشاعى قورعانىس مينيسترلىگى باسشىلىعىنىڭ اۋەدەگى كوماندالىق پۋنكتى بولىپ ەسەپتەلەدى. اسكەريلەر ونى سەنىمدى ءارى كوپ فۋنكتسيالى اۋە كولىگى رەتىندە جاقسى بىلەدى. نەگىزىنەن ىشكى جانە حالىقارالىق باعىتتاردا تاسىمالداۋ تاپسىرمالارىن ورىنداۋعا ارنالعان. ۇشاق 150 دەن 180 گە دەيىن اسكەري قىزمەتشىنى 3000 نان 5000 شاقىرىمعا دەيىنگى قاشىقتىقتا تاسىمالداي الادى. سونداي-اق جۇك تاسىمالىنا دا بەيىمدەپ قولدانۋعا بولادى.
A-400M - ءارتۇرلى تاپسىرمالاردى ورىنداۋعا ارنالعان كوپ ماقساتتى اسكەري كولىك. ول اسكەري تاسىمالداۋ، مەديتسينالىق ەۆاكۋاتسيالاۋ، سونداي-اق گۋمانيتارلىق ميسسيالاردى ورىنداۋ وپەراتسيالارىن ورىندايدى. ونىڭ ىشىندە A-400 دەپ اتالاتىن سوڭعى بۋىنى زاماناۋي ءتورت قوزعالتقىشپەن جابدىقتالعان. بۇل اۋە تەحنيكاسى جاراق قۇرامىنا 2024 -جىلدىڭ سوڭىندا جەتكىزىلدى.
سۋ-30 س م جويعىشتارى كۇن سايىن ءبىزدىڭ ەل ايماقتارىندا جاۋىنگەرلىك كەزەكشىلىك اتقارادى. ۇشاق قارۋ-جاراقتىڭ كەڭ سپەكترىمەن جانە بورت راديوەلەكتروندىق جابدىقتاردىڭ زاماناۋي كەشەنىمەن جاراقتالعان. سۋ-30 س م كوپ ماقساتتى اۋىر مايداندىق جويعىشى كۇندىز-ءتۇنى ءارتۇرلى اۋا-رايى جاعدايىندا جاۋىنگەرلىك مىندەتتەردى ورىنداي الادى. ول اۋە نىساندارىن دا، جەردەگى كەدەرگىنى دە جويا الادى. باسقارىلاتىن زىمىرانمەن، اۆياتسيالىق قارۋمەن جاساقتالعان، 1,5 (ءبىر جارىم) كەلىگە دەيىنگى كاليبرلى بومبالار، زەڭبىرەك پەن زاماناۋي ناۆيگاتسيا جۇيەسى بار.
سۋ-25 اسكەري شابۋىل ۇشاعى قۇرلىق اسكەرىن اۋەدەن قولداۋ ءۇشىن، كۇندىز-ءتۇنى ۇرىس دالاسىندا نىسانا ناقتى كورىنگەندە تىكەلەي قولدانۋعا، سونداي-اق كەز كەلگەن مەتەوجاعدايدا تاۋلىك بويى بەرىلگەن كوورديناتتارى بار وبەكتىلەردى جويۋعا ارنالعان. سۋ-25 ۇشاعىن وسى سيپاتتارىنا قاراي «قاناتتى تانك» دەپ تە اتايدى.